کشتواڑ، 13 نومبر: کشتواڑ میں دو اسپیشل پولیس آفیسرز (ایس پی اوز) کے قتل کے بعد پولیس نے تین مطلوب دہشت گردوں کے پوسٹر جاری کیے ہیں اور ان کی گرفتاری میں مددگار معلومات فراہم کرنے والوں کے لیے مجموعی طور پر 30 لاکھ روپے نقد انعام کا اعلان کیا ہے۔
پولیس کے مطابق تین مطلوب افراد کی شناخت محمد امین عرف جہانگیر، ریاض احمد عرف ہزارہ اور مدثر حسین کے نام سے ہوئی ہے۔ضلع پولیس کشتواڑ کی جانب سے جاری کیے گئے پوسٹروں میں تینوں افراد کی تصاویر شامل ہیں۔ پولیس نے عوام سے اپیل کی ہے کہ اگر کسی کو بھی ان کے ٹھکانوں یا نقل و حرکت کے بارے میں کوئی معلومات حاصل ہوں تو وہ پولیس کو آگاہ کریں۔
پولیس نے معلومات فراہم کرنے کے لیے دو رابطہ نمبر بھی جاری کیے ہیں:
1995357494
9797900958
پولیس نے یقین دہانی کرائی ہے کہ اطلاع دینے والے افراد کی شناخت مکمل طور پر خفیہ رکھی جائے گی۔یہ اعلان کشتواڑ میں دو ایس پی اوز، رشپال کمار اور بابی چند کے قتل کے بعد کیا گیا ہے۔ دونوں اہلکاروں کی گولیوں سے چھلنی لاشیں مڑوہ کے جنگلاتی علاقے سے برآمد ہوئی تھیں۔
واقعے کے بعد سکیورٹی ایجنسیوں نے کشتواڑ میں تلاشی اور سکیورٹی کارروائیاں تیز کر دی ہیں۔ حکام کی جانب سے قتل میں ملوث افراد کا سراغ لگانے کی کوششیں جاری ہیں، جبکہ تین مطلوب افراد کے بارے میں معلومات حاصل کرنے اور ان کی گرفتاری میں عوامی تعاون یقینی بنانے کے لیے 30 لاکھ روپے انعام کا اعلان کیا گیا ہے۔
