جموں،12 اگست (یو این آئی) جموں و کشمیر سپورٹس کونسل کے ملازمین نے پنشن پالیسی بنانے کے مطالبے کو لے کر لیفٹیننٹ گورنر منوج سنہا کے ساتھ رابطہ کیا ہے۔
بتادیں کہ جموں و کشمیر سپورٹس کونسل یونین ٹریٹری میں کھیل سرگرمیوں کو فروغ دینے کے لئے ایک خود مختار ادارہ ہے اور لیفٹننٹ گورنر منوج سنہا اس ادارے جس کے قریب 325 ملازم ہیں، کے صدر ہیں۔
ملازمین کو کہنا ہے کہ لیفٹیننٹ گورنر کی سرکار کے دوران سپورٹس شعبے میں بتدریج بڑی تبدیلیاں رونما ہونا شروع ہوئی ہیں۔انہوں نے امید ظاہر کی کہ ان کے لئے پنشن پالیسی بنانے کے مطالبے کو بھی موصوف لیفٹیننٹ گورنر کی قیادت میں عملی جامہ پہنایا جائے گا۔
ٹوکیو اولمپکس کا حوالہ دیتے ہوئے سپورٹس کونسل کے ملازمین نے کہا کہ ان مقابلوں میں بھارتی کھلاڑیوں کی غیر متوقع کارکرگی کے بعد کوچز کی عزت افزائی کی گئی لیکن سپورٹس کونسل کے ملازمین کے جوش و جذبے کی خال ہی قدر کی جاتی ہے۔
کونسل کے ایک ملازم نے اپنا نام مخفی رکھنے کی خواہش ظاہر کرتے ہوئے یو این آئی کو بتایا کہ سپورٹس کونسل کا ہر ملازم محکمے کی انتہائی جوش و جذبے کے ساتھ خدمت کر رہا ہے۔انہوں نے کہا کہ ہمارے لئے پنشن پالیسی بنانا ہماری سب سے بڑی اور اہم مانگ ہے۔
ایک اور ملازم نے کہا کہ مختلف عہددوں پر فائز ملازمین کونسل کو بہتر سے بہتر بنانے کے لئے اپنا رول ادا کر رہے ہیں تو پھر انہیں پنشن سے محروم کیوں رکھا جائے گا۔انہوں نے کہا کہ محکمہ جموں و کشمیر یوتھ سروسز اینڈ سپورٹس کے ملازمین کو پنشن دی جاتی ہے۔
ان کہ تجویز تھی کہ جموں و کشمیر سپورٹس کونسل کو جموں وکشمیر یوتھ سروسز اینڈ سپورٹس میں ضم کیا جانا چاہئے تاکہ پنشن سے محروم ملازموں کو اپنا حق مل سکے۔ان کا مزید کہنا تھا کہ پنشن پالیسی نہ ہونے کی وجہ سے سبکدوش ملازموں کو مالی بحران کا سامنا ہے۔
یو این آئی
