دفعہ 144 کے نفاذ کا مقصد کورونا کے پھیلاؤ کو روکنا ہے: ایس ایس پی سری نگر

سری نگر/ کورونا وبا کی دوسری لہر کی روک تھام کو ممکن بنانے کے لئے حکام نے بدھ کے روز سری نگر کے میونسپل حدود میں آنے والے علاقوں میں دفعہ 144 نافذ کر دیا۔
دفعہ 144 کے نفاذ پر عمل در آمد کو یقینی بنانے کے لئے ایس ایس پی سری نگر سندیپ چودھری نے سری نگر کے تجارتی مرکز سمیت بعض علاقوں کا دورہ کیا۔
انہوں نے اس موقع پر نامہ نگاروں کے ساتھ بات کرتے ہوئے کہا کہ سری نگر کے میونسپل حدود میں دفعہ 144 نافذ کرنے کا مقصد کورونا کی لہر کو پھیلنے سے روکنا ہے۔
موصوف ایس ایس پی نے کہا کہ مصروف ترین بازاروں میں کام مشکل ہے اور ایس او پیر اور دفعہ 144 کے نفاذ پر عمل در آمد لوگوں کے تعاون کے بغیر ممکن نہیں ہے۔
انہوں نے لوگوں خاص کر دکانداروں اور ہوٹل مالکان سے اپیل کی کہ وہ باقی کورونا گائیڈ لائنز کے ساتھ ساتھ دفعہ 144 کے نفاذ پر عمل در آمد کو یقینی بنانے پر بھی اپنا تعاون دیں۔
موصوف ایس ایس پی نے کہا کہ مسافر بردار گاڑیوں میں بھیڑ ایک چلینج ہے۔
انہوں نے کہا کہ ہم اس کے لئے بھی ایک راستہ تلاش کر رہے ہیں تاکہ گاڑیوں میں مسافروں کی بھیڑ کو کم کیا جاسکے۔
یو این آئی