ایشین میل نیوز ڈیسک

سری نگر:بلدیاتی اداروں کے صدور و کونسلروں کی کشمیر ولداخ کاڈی نیشن کمیٹی نے انتظامیہ پر الزام عائد کرتے ہوئے کہا ہے کہ ان کے ساتھ سوتیلی ماں کا سلوک کیا جارہا ہے اور وہ حلف برداری کے روز اول سے ہی تنخواہوں سے محروم ہیں۔

ہفتہ کے روز یہاں ‘ایوان صحافت’ میں منعقدہ ایک پریس کانفرنس کے دوران کاڈی نیشن کمیٹی کشمیر و لداخ کے ایک لیڈر نے کہا ‘ریاست میں جو بلدیاتی چناؤ ہوئے، وزیر اعظم نریندر مودی نے لال قلعہ سے اعلان کیا کہ ہم جموں کشمیر میں بلدیاتی و پنچایتی چناؤ کرائیں گے، کیونکہ اس وقت حالات ہی ایسے تھے اور ہم نے جان جوکھم میں ڈال کر یہ چناؤ لڑے لیکن انتظامیہ میں سارے نہیں بعض بیوروکریٹ ہمارے ساتھ سوتیلی ماں کا سلوک کررہے ہیں’۔
انہوں نے کہا کہ چھ ماہ گذرجانے کے باوجود بھی ہم ابھی تنخواہوں سے محروم ہیں۔

کمیٹی کے لیڈر نے کہا ‘ہماری رکی پڑی تنخواہ ابھی واگذار نہیں ہوئی ہے جب ایک ایم ایل اے، ایم ایل سی کی تنخواہ واگذار ہوتی ہے تو ہماری تنخواہ کیوں واگذار نہیں ہوتی ہے’۔

انہوں نے کہا کہ حلف برداری سے لے کر ان کی تنخواہ واگذار نہیں کی گئی اور وہ وارڈ وں کے دوروں کے دوران بھی اپنے جیب سے خرچہ کرتے ہیں۔
انہوں نے کہا کہ میونسپل کمیٹیوں کے صدور چھوٹے موٹے ایم ایل اے ہوتے ہیں لیکن ابھی تک نہ ہی کبھی ان کی کوئی میٹنگ بلائی گئی اور نہ ہی میونسپل صدور، نائب صدور اور کونسل کا گیزٹ ہی اجرا کیا گیا۔

انہوں نے الزام عائد کیا کہ میونسپل کمیٹیوں کے ایگزیکیٹو افسران انہیں خاطر میں ہی نہیں لاتے ہیں۔