’پیڈل تھرو پیراڈائز‘ کی اختتامی تقریب سے خطاب، کھیلوں اور قوم کی تعمیر میں نوجوانوں کی شرکت پر زور
سرینگر: جموں و کشمیر کے لیفٹیننٹ گورنر منوج سنہا نے جمعرات کو نوجوانوں سے اپیل کی کہ وہ منشیات سے دور رہیں اور کھیلوں کے ساتھ ساتھ قوم کی تعمیر میں بھی سرگرمی سے حصہ لیں۔ انہوں نے کہا کہ نوجوانوں کی توانائی، خود اعتمادی اور مثبت سوچ ایک پُرامن، ترقی یافتہ اور خوشحال جموں و کشمیر کی تعمیر کے لیے انتہائی اہم ہیں۔
ڈل جھیل کے کنارے واقع پولیس گالف کورس میں ’پیڈل تھرو پیراڈائز 2026‘ کی اختتامی تقریب سے خطاب کرتے ہوئے لیفٹیننٹ گورنر نے نوجوانوں میں نظم و ضبط، جسمانی تندرستی اور مثبت سوچ کو فروغ دینے میں کھیلوں کی اہمیت کو اجاگر کیا۔
انہوں نے سائیکلنگ مقابلے میں حصہ لینے والے شرکاء اور کامیاب کھلاڑیوں کو مبارک باد پیش کرتے ہوئے کہا کہ اس طرح کی سرگرمیاں نوجوانوں کو اپنی صلاحیتوں کا مظاہرہ کرنے اور اپنی توانائی کو تعمیری کاموں میں صرف کرنے کے لیے ایک بہترین پلیٹ فارم فراہم کرتی ہیں۔
منوج سنہا نے کہا کہ جموں و کشمیر پولیس اپنی بنیادی ذمہ داریوں سے آگے بڑھ کر بھی اہم کردار ادا کر رہی ہے۔ اس سلسلے میں ایسے اقدامات کیے جا رہے ہیں جن کا مقصد عوامی اعتماد کو مضبوط بنانا، سماجی ہم آہنگی کو فروغ دینا اور نوجوانوں کو مثبت سرگرمیوں میں شامل کرنا ہے۔
انہوں نے کہا کہ ’جشنِ ڈل‘ اور ’پیڈل تھرو پیراڈائز‘ جیسے اقدامات امید، نظم و ضبط اور خود اعتمادی کا پیغام دیتے ہیں۔ اس کے ساتھ ساتھ یہ نوجوانوں کو اپنے ماحول سے جوڑنے اور معاشرتی سرگرمیوں میں ان کی زیادہ سے زیادہ شرکت کی حوصلہ افزائی کرتے ہیں۔
لیفٹیننٹ گورنر نے کہا کہ نوجوان نہ صرف ملک کا مستقبل ہیں بلکہ موجودہ دور کی طاقت بھی ہیں۔ کھیلوں، اختراعات اور کاروباری سرگرمیوں میں ان کی کامیابیاں اس صلاحیت کی عکاسی کرتی ہیں کہ وہ خطے کی ترقی میں اہم کردار ادا کر سکتے ہیں۔
انہوں نے منشیات کے استعمال کے خلاف اجتماعی کوششوں کی ضرورت پر بھی زور دیا اور کہا کہ اس چیلنج سے نمٹنے کے لیے خاندانوں، سماجی برادریوں اور خود نوجوانوں کو آگے آنا ہوگا۔
منوج سنہا نے اس بات پر زور دیا کہ نشے کی لت میں مبتلا افراد کے ساتھ سماجی امتیاز اور حقارت کے بجائے ہمدردی اور تعاون کا رویہ اپنایا جانا چاہیے۔ انہوں نے کہا کہ ایسے افراد کی صحت یابی اور انہیں دوبارہ معمول کی زندگی کی طرف لانے میں معاشرے کا اہم کردار ہے۔
انہوں نے کہا کہ نوجوانوں کو صحت مند، محفوظ اور اپنے مقاصد پر مرکوز رکھنے کے لیے مسلسل کوششیں جاری رہنی چاہئیں۔ ان کا کہناتھا کہ ایک پُرامن اور خوشحال جموں و کشمیر کی تعمیر کے لیے نوجوانوں کی فعال شرکت ناگزیر ہے۔
(کے این او)
