اننت ناگ: سرینگر ۔جموں شاہراہ پر سنگم کے مقام پر ٹول پوسٹ یا کائونٹر قائم کئے جانے اور یہاں سے گذرنے والی تمام چھوٹی بڑی گاڑیوں پر بھاری ٹیکس وصولنے کے خلاف منگل کو جنوبی کشمیر میں ٹرانسپورٹروں کی کال پر ہڑتال کی جارہی ہے ،جسکی وجہ سے یہاں معمولات زندگی متاثر رہے۔
تفصیلات کے مطابق جنوبی کشمیر میں منگل کو معمولاتِ زندگی متاثر رہی کیونکہ یہاں ٹرانسپورٹر کشمیر شاہراہ پر بھاری ٹول ٹیکس کیخلاف ہڑتال پر ہیں۔
جنوبی کشمیر کے ٹرانسپورٹر کشمیر کی گاڑیوں کو ٹول ٹیکس سے مستثنیٰ رکھنے کا مطالبہ کررہے ہیں۔اطلاعات کے مطابق ٹرانسپورٹروں کی ہڑتال کی وجہ سے مسافروں کو سخت مشکلات درپیش آئی ہیں ۔
واضح رہے کہ اونتی پورہ علاقے میں قائم نئے ٹول پلازا پر اس ماہ کے آغاز سے بھاری ٹول ٹیکس وصولنے کا سلسلہ شروع کیا گیا ہے جس کیخلاف اہل وادی میں تشویش کی لہر دوڑ گئی ہے اور ہر خاص و عام اس کو ختم کرنے کا مطالبہ کررہا ہے۔
ریاستی گورنر ستیہ پال ملک نے یقین دلایا ہے کہ معاملہ مرکزی سرکار کیساتھ اُٹھایا گیا ہے اور مقامی گاڑیوں کو ٹیکس سے مبرا قرار دئے جانے سے متعلق احکامات جاری کئے جائیں گے۔
