سرینگر: صوبہ جموں کے پونچھ اور راجوری اضلاع میں حد متارکہ پر صورتحال دھماکہ خیز بنی ہوئی ہے جبکہ ہند ۔پاک افواج کے درمیان فائرنگ اور ماٹر شلنگ کے نتیجے میں آر پار ہلاکتیں رونما ہوئیں۔اس ضمن میں ملنے والی تفصیلات کے مطابق پونچھ میں بچی کی ہلاکت کے بعد ایک خاتون کی موت ہوگئی جبکہ 5عام شہری زخمی ہوئے ۔
اطلاعات کے مطابق سوموار کی شب طرفین کے مابین تازہ فائرنگ اور ماٹر شلنگ ہوئی جسکے نتیجے میں یہ قیمتی جانوں کا اتلاف ہوا ۔سجاد بی زوجہ محمد یعقوب نامی خاتون کرشنا گھاٹی سیکٹر میں بلونی علاقے میں آر پار کراس فائرنگ اور گولہ باری کے نتیجے میں ہلاک ہوئیں ۔یہ اطلاع علاقے کے سرپنچ محمد شریف نے دی ہے ۔
بتایا جاتا ہے کہ پاکستانی فوج کی فائرنگ اور ماٹر شلنگ کے نتیجے میں مزید 5عام شہری بھی زخمی ہوئے،جنہیں علاج ومعالجہ کی خاطر اسپتال منتقل کیا گیا ۔پونچھ ضلعے میں انتظامی حکام نے لائن آف کنٹرول پر جاری کشیدگی کے پیش نظر 5کلو میٹر کے سرحدی حدود میں تعلیمی ادارے بند رکھنے کا فیصلہ لیا ہے ۔
حکام کے مطابق ضلعے میں حدمتارکہ کے نزدیک پانچ کلو میٹر کے حدود میں آج یعنی منگلوار کو تمام تعلیمی ادارے بند رہیں گی ۔گذشتہ کئی ہفتوں سے لائن آف کنٹرول پر صورتحال انتہائی دھمالہ خیز بنی ہوئی ہے ،جسکی وجہ سے سرحدی آبادی میں خوف وہراس اور اضطرابی کیفیت پائی جارہی ہے ۔
دفاعی ترجمان کا کہنا ہے کہ پاکستانی فوج مسلسل حد متارکہ پر سیز فائر سمجھوتے کی خلاف ورزی کررہی ہے ،جس کا موثر جواب دیا جارہا ہے ۔
پاکستان فوج کے3اہلکار،شہری ہلاک ،متعدد افراد زخمی
پاکستانی فوج کے شعبہ تعلقات عامہ (آئی ایس پی آر) کے مطابق بھارتی فوج نے لائن آف کنٹرول پر سیز فائر معاہدے کی خلاف ورزی کرتے ہوئے رکھ چکری میں راولا کوٹ سیکٹر پر فائرنگ کی جس کے نتیجے میں پاکسانی فوج کے 3 اہلکار صوبیدار محمد ریاض، لانس حوالدار عزیز اللہ اور سپاہی منصب ہلاک ہوگئے جب کہ ایک اہلکار زخمی ہے۔
ڈان اردو کی ایک رپورٹ کے مطابق بھارتی فوج کی لائن آف کنٹرول (ایل او سی) پرفائرنگ کے نتیجے میں ایک بزرگ شہری جاں بحق اور 2 خواتین سمیت 5 افراد زخمی ہوگئے۔حویلی کے ضلعی ہیڈ کوارٹرز فارورڈ کہوٹہ کے پولیس افسر انصار صدیق نے بتایا ہے کہ بھارتی فوج نے پیر کی صبح 7 بجے نیزہ پیر پر ہلکے اور بھاری ہتھیاروں سے بلااشتعال فائرنگ اور گولہ باری کی۔
انہوں نے کہا کہ بھارتی فوج نے پاکستانی چیک پوسٹوں اور شہری آبادی کو نشانہ بنایا۔ان کا کہنا تھا کہ گولے کے اسپلنٹرز لگنے سے اَخوری گائوں میں مویشیوں کو چڑھانے والے 75 سالہ بزرگ شہری غلام محمد موقع پر ہی جاں بحق ہو گئے۔
انصار صدیق نے کہا کہ اسی سیکٹر کے گائوں کیرنی میں 15 سالہ محمد یوسف اور 15 سالہ محمد آصف جبکہ مَندھار گائوں میں 55 سالہ اکبر جان اور 11 سالہ محمد شہزاد زخمی ہوئے۔زخمیوں کو ڈسٹرکٹ ہیڈ کوارٹرز کہوٹہ میں پاک فوج کے زیر انتظام چلنے والے مرکز صحت منتقل کیا گیا، جہاں ان کی حالت تشویشناک بتائی گئی۔
ضلع کوٹلی کے ایک عہدیدار نے ڈان اردو کو بتایا کہ گوئی اور تتہ پانی سیکٹرز میں گزشتہ رات سے شدید شیلنگ کی جارہی ہے۔ان کا کہنا تھا کہ شیلنگ سے گوئی بٹالی گاو¿ں میں 28 سالہ خاتون رُبینہ کوثر زخمی ہوئیں جبکہ تتہ پانی سیکٹر کے گائوں دَھنا میں 2 گھروں کو بھی نقصان پہنچا۔
یاد رہے کہ سنہ2003میں دنوں ممالک کے درمیان فائربندی کا سمجھوتہ طے پایا گیا ،تاہم اسکے باوجود طرفین کے مابین گولہ باری کا تبادلہ ہوتا رہتا ہے ،جسکی وجہ سے آر پار ہلاکتیں رونما ہورہی ہیں ۔
