کشتواڑ، 12 نومبر: کشتواڑ کے دور دراز علاقے مڑوہ میں عارضی آرمی آپریٹنگ بیس کی جانب جاتے ہوئے لاپتہ ہونے والے دو اسپیشل پولیس آفیسرز (ایس پی اوز) کی تلاش جمعرات کو ایک المناک سانحے پر ختم ہوئی، جب دونوں اہلکاروں کی لاشیں مبینہ طور پر دہرنا کے جنگلاتی علاقے سے برآمد کی گئیں۔
لاپتہ اہلکاروں کی شناخت 45سالہ رشپال کمار اور 57سالہ بوبی چند کے طور پر ہوئی ہے، دونوں کیار دچھن کے رہائشی تھے۔دونوں جاں بحق اہلکار پولیس پوسٹ کیار میں تعینات تھے۔ وہ بدھ کے روز آرمی کی 17 راشٹریہ رائفلز کے عارضی آپریٹنگ بیس (ٹی او بی) واقع دہرنا ٹاپ میں اپنی باری کی ڈیوٹی انجام دینے کے لیے روانہ ہوئے تھے، تاہم اس کے بعد لاپتہ ہوگئے۔
دستیاب اطلاعات کے مطابق، بدھ کی شام تقریباً 4 بج کر 30 منٹ پر بچنان جنگلاتی علاقے سے فائرنگ کی آوازیں سنی گئیں، جہاں تقریباً 20 سے 25 راؤنڈ فائر کیے جانے کی اطلاع ہے۔ یہ علاقہ مڑوہ کے دہرنا میں واقع اندرون فاریسٹ بلاک کے تحت آتا ہے۔
اسی دوران دونوں ایس پی اوز اپنی مقررہ ڈیوٹی انجام دینے کے لیے کیار سے آرمی کے عارضی آپریٹنگ بیس کی جانب جا رہے تھے۔ ہفتہ وار ڈیوٹی کی تبدیلی کے انتظام کے تحت پولیس پوسٹ کیار سے دو اہلکار آرمی کے ساتھ مذکورہ بیس پر تعینات کیے جاتے ہیں۔
ابتدائی طور پر دونوں ایس پی اوز کے ساتھ پولیس پوسٹ کیار کی اسپیشل آپریشنز گروپ (ایس او جی) کی ایک ٹیم بھی کیار ٹاپ تک گئی، جس کی قیادت انچارج سینئر گریڈ کانسٹیبل نثار احمد کر رہے تھے۔ کیار ٹاپ پہنچنے کے بعد ٹیم کو گھوڑوں پر سامان لے جانے والے افراد نظر آئے، جس کے بعد رشپال اور ببی چند ان کے ساتھ مزید آگے آپریٹنگ بیس کی جانب روانہ ہوگئے، جبکہ ایس او جی کی ٹیم واپس پولیس پوسٹ کیار کی طرف لوٹ آئی۔
تاہم دونوں اہلکار اپنی مقررہ منزل تک نہیں پہنچ سکے اور ان کے بارے میں کوئی اطلاع نہیں مل سکی۔ دوسری جانب، عارضی آپریٹنگ بیس پر اپنی ڈیوٹی مکمل کرنے کے بعد واپس آنے والے دونوں ایس پی اوز بحفاظت پولیس پوسٹ کیار پہنچ گئے تھے۔
دونوں اہلکاروں کے لاپتہ ہونے کے بعد پولیس اسٹیشن مڑوہ، ایس او جی مڑوہ اور آرمی کی 17 راشٹریہ رائفلز کے اہلکاروں پر مشتمل ایک مشترکہ تلاشی آپریشن شروع کیا گیا۔ لاپتہ اہلکاروں کا سراغ لگانے اور ان کے لاپتہ ہونے کے حالات کا پتہ لگانے کے لیے آس پاس کے جنگلاتی اور پہاڑی علاقوں میں تلاشی ٹیمیں تعینات کی گئیں۔
دونوں ایس پی اوز اپنے سرکاری ہتھیاروں اور گولیوں سے لیس تھے۔ رشپال کے پاس ایک انساس رائفل اور 60 گولیاں تھیں، جبکہ ببی چند کے پاس ایک 303 رائفل اور 50 گولیاں موجود تھیں۔
جمعرات کو قومی میڈیا میں شائع ہونے والی خبروں کے مطابق، دونوں اہلکاروں کی لاشیں برآمد کرلی گئی ہیں اور ان کے جسموں پر گولیوں کے زخم پائے گئے ہیں۔ ان کے سرکاری ہتھیار بھی لاپتہ بتائے جا رہے ہیں۔ تاہم دونوں اہلکاروں کو کن حالات میں قتل کیا گیا، اس حوالے سے تحقیقات جاری ہیں۔
لاپتہ ہونے کے وقت جنگلاتی علاقے سے فائرنگ کی اطلاعات نے واقعے کی سنگینی میں مزید اضافہ کردیا ہے، تاہم اس رپورٹ کی اشاعت تک فائرنگ اور دونوں اہلکاروں کی ہلاکت کے درمیان براہِ راست تعلق کے حوالے سے کوئی سرکاری تصدیق سامنے نہیں آئی تھی۔دریں اثنا، واقعے کی تحقیقات شروع کردی گئی ہیں، جبکہ موت کی اصل وجہ معلوم کی جا رہی ہے۔
نیوز ایجنسیز
