سری نگر، 9 نومبر: جموں و کشمیر بورڈ آف اسکول ایجوکیشن (جے کے بورڈ) نے پیر کے روز کہا کہ وہ دسویں، گیارہویں اور بارہویں جماعت کے سالانہ ریگولر امتحانات کے نتائج جنوری کے دوسرے ہفتے تک جاری کرنے کا ہدف رکھتا ہے۔
نامہ نگاروں سے بات کرتے ہوئے جے کے بورڈ کے چیئرمین غلام حسن شیخ نے کہا کہ امتحانات خوش اسلوبی سے جاری ہیں اور آئندہ دو ہفتوں کے دوران امتحانات مکمل ہونے کی توقع ہے۔
انہوں نے کہا کہ بورڈ کی کوشش ہے کہ 10 جنوری تک تینوں جماعتوں کے نتائج جاری کر دیے جائیں۔مفت درسی کتابوں کی تقسیم کے حوالے سے بورڈ چیئرمین نے بتایا کہ تعلیمی زونوں میں مفت کتابیں پہنچانے کا عمل آئندہ 8 سے 10 دنوں میں مکمل کر لیا جائے گا۔
انہوں نے واضح کیا کہ بورڈ مفت درسی کتابیں زونل ایجوکیشن دفاتر تک پہنچاتا ہے، جس کے بعد مستحق طلبہ میں ان کی تقسیم کی ذمہ داری ڈائریکٹوریٹ آف اسکول ایجوکیشن کی ہوتی ہے۔
غلام حسن شیخ کے مطابق پہلی سے آٹھویں جماعت تک تقریباً 8 لاکھ 20 ہزار طلبہ مفت درسی کتابوں کے اہل ہیں، جن میں کشمیر ڈویژن کے 3 لاکھ 31 ہزار طلبہ بھی شامل ہیں۔
انہوں نے کہا کہ کئی برسوں بعد پہلی مرتبہ تعلیمی سیشن کے آغاز کے ساتھ ہی مفت درسی کتابوں کی تقسیم کا عمل شروع کیا گیا ہے۔
بورڈ چیئرمین نے مزید بتایا کہ زونل افسران کو کتابوں کی تقسیم کا شیڈول جاری کر دیا گیا ہے اور انہیں ہدایت دی گئی ہے کہ وہ مقررہ شیڈول پر عمل درآمد کو یقینی بنائیں۔
(کے این او)
