سرینگر، 27 اکتوبر: جموں و کشمیر اسمبلی میں قائد حزب اختلاف سنیل شرما نے منگل کو کہا کہ وہ کابینہ میں شامل نہ کیے جانے والے ارکان اسمبلی کے ساتھ کھڑے رہیں گے اور ان کی مایوسی دور کرنے کی کوشش کریں گے۔
کشمیر نیوز آبزرور (کے این او) کے مطابق، کابینہ کی توسیع کے بعد نامہ نگاروں سے گفتگو کرتے ہوئے سنیل شرما نے نئے شامل کیے گئے وزراء کو مبارک باد دی اور امید ظاہر کی کہ وہ جموں و کشمیر کے عوام کی خدمت کے لیے سنجیدگی سے کام کریں گے۔
انہوں نے کہا کہ نئے وزراء کو عوامی مسائل پر توجہ مرکوز کرنی چاہیے اور حکومت کو درپیش سیاسی کشمکش سے نکل کر عام لوگوں کی ضروریات پوری کرنے کے لیے کام کرنا چاہیے۔
سنیل شرما نے کہا، ’’میں نئے مقرر کیے گئے وزراء کو مبارک باد دیتا ہوں۔ انہیں جموں و کشمیر کے عوام کے لیے محنت کرنی چاہیے اور حکومت جس سیاسی کشمکش میں پھنسی ہوئی ہے، اس سے نکل کر عام لوگوں کی خدمت کرنی چاہیے۔‘‘
کابینہ میں جگہ نہ پانے والے رہنماؤں کا ذکر کرتے ہوئے قائد حزب اختلاف نے کہا کہ ان کی مایوسی دور کرنا وزیر اعلیٰ عمر عبداللہ کی ذمہ داری ہے، تاہم وہ خود بھی ایسے رہنماؤں کے ساتھ کھڑے رہیں گے۔
انہوں نے کہا، ’’میں ان کے آنسو پونچھوں گا، لیکن عمر صاحب کی ذمہ داری ہے کہ وہ ان کے آنسو پونچھیں۔ ہم بھی ان کے آنسو پونچھیں گے۔‘‘
حکومت کے اندر اختلافات کی اطلاعات اور اس کے مستقبل سے متعلق سوال پر سنیل شرما نے جلد بازی میں کوئی نتیجہ اخذ کرنے سے گریز کرنے کی تلقین کی۔ انہوں نے کہا کہ حلف برداری کی تقریب ختم ہوئے ابھی بمشکل ایک گھنٹہ گزرا ہے، اس لیے حکومت کے استحکام کے بارے میں فوری قیاس آرائیاں مناسب نہیں۔
انہوں نے کہا، ’’صبر سے کام لیں، جلدی نہ کریں۔‘‘کابینہ کی توسیع کے بعد جہاں چار نئے وزراء نے عہدے اور رازداری کا حلف اٹھایا، وہیں بعض سینئر رہنماؤں کی جانب سے وزارت نہ ملنے پر مایوسی کا اظہار بھی سامنے آیا ہے۔ سنیل شرما کے بیان نے اس معاملے کو ایک نئی سیاسی جہت دی ہے، تاہم حکومت کے استحکام یا مستقبل کے بارے میں کوئی حتمی نتیجہ اخذ کرنا فی الحال قبل از وقت ہوگا۔
