جموں، 27 جولائی: ادھم پور ضلع کے دیوال علاقے میں لینڈ سلائیڈنگ کے باعث سرینگر۔جموں قومی شاہراہ (NH-44) پیر کے روز بھی بند رہی۔ ملبہ ہٹانے اور ٹریفک بحال کرنے کے لیے بحالی کا کام جاری ہے۔
ٹریفک حکام کے مطابق متاثرہ مقام پر مزید لینڈ سلائیڈنگ اور پہاڑ سے پتھر گرنے کے خدشات کے پیش نظر شاہراہ کو ابھی تک گاڑیوں کی آمد و رفت کے لیے محفوظ قرار نہیں دیا گیا۔
مسافروں کو ہدایت دی گئی ہے کہ جب تک شاہراہ کو سرکاری طور پر محفوظ قرار دے کر ٹریفک کے لیے دوبارہ نہ کھولا جائے، اس پر سفر کرنے سے گریز کریں۔
حکام نے عوام سے یہ بھی اپیل کی ہے کہ شاہراہ کی صورتحال سے متعلق افواہوں پر توجہ نہ دیں اور مستند معلومات کے لیے صرف سرکاری ٹریفک اپ ڈیٹس پر ہی اعتماد کریں۔ [KNT]
