سری نگر: یوم جمہوریہ کی پرمسرت تقریب کے موقع پر آج ڈویژنل کمشنر کشمیر کے دفتر میں ایک پروقار اور شاندار پرچم کشائی تقریب منعقد ہوئی جس میں قومی ترنگا فضا میں لہرا کر حب الوطنی اور قومی یکجہتی کے جذبے کو اجاگر کیا گیا۔
تقریب کے دوران ڈویژنل کمشنر کشمیر انشل گرگ نے قومی پرچم لہرایا اور سنٹرل ریزرو پولیس فورس کے دستے کی جانب سے پیش کیے گئے شاندار سلامی مارچ کا معائنہ کیا۔ اس موقع پر ڈپٹی کمشنر سری نگر، اکشے لابرو، ایڈیشنل ڈپٹی کمشنر سری نگر، اسسٹنٹ کمشنر سنٹرل، ڈی ڈی پی، سی پی او سری نگر، او ایس ڈی ٹو ڈویژنل کمشنر سمیت دفتر کے متعدد اعلیٰ افسران اور عملہ موجود تھا۔
اپنے خطاب میں ڈویژنل کمشنر نے یوم جمہوریہ کی تاریخی اہمیت اور اس کے پس منظر پر تفصیل سے روشنی ڈالی۔ انہوں نے کہا کہ آج کا دن اُن عظیم سپوتوں کی قربانیوں کو یاد کرنے کا موقع ہے جنہوں نے ملک میں جمہوری قدروں کے قیام اور امن و امان کی فضا برقرار رکھنے کے لیے اپنی جانیں نچھاور کیں۔
انہوں نے موجود افسران و اہلکاروں کو یاد دہانی کرائی کہ وہ قومی خدمت کے جذبے کے ساتھ اپنی ذمہ داریاں نبھائیں، دیانت داری، لگن اور خلوص کے ساتھ عوامی خدمت کو اپنا مشن بنائیں اور ملک کے دستور میں درج اقدار اور اصولوں کو ہمیشہ مقدم رکھیں۔
آخر میں انشل گرگ نے یوم جمہوریہ کے موقع پر وادی کشمیر سمیت ملک بھر کے شہریوں کو دل کی عمیق گہرائیوں سے مبارک باد پیش کرتے ہوئے کہا کہ یہ قومی تہوار پورے جوش، جذبے اور سچے وطن پرستانہ ولولے کے ساتھ منایا جاتا ہے اور کشمیر کے ہر کونے میں اس کے رنگ نمایاں طور پر دیکھے جا سکتے ہیں۔
