جموں: منشیات کے خلاف جنگ کو جاری رکھتے ہوئے کٹھوعہ پولیس نے ایک منشیات فروش کو گرفتار کرکے اس کی تحویل سے ہیروئن جیسا ممنوعہ مواد بر آمد کیا ہے۔ایک پولیس ترجمان نے اپنے ایک بیان میں کہا کہ ایک مصدقہ اطلاع پر کارروائی کرتے ہوئے کٹھوعہ پولیس کی ایک ٹیم نے کولین دالہ علاقے میں ایک خصوصی ناکے پر ایک شخص کو روکا۔
انہوں نے کہا کہ تلاشی کے دوران اس کی تحویل سے 10 گرام ہیروئن جیسا ممنوعہ مواد بر آمد کیا گیا جس کے بعد اس کو بر سر موقع ہی گرفتار کیا گیا۔ملزم کی شناخت پربجوت سنگھ عرف لالہ ولد جسپال سنگھ ساکن وارڈ نمبر8 تحصیل و ضلع کٹھوعہ کے طور پر کی گئی ہے۔
پولیس ترجمان نے بتایا کہ اس سلسلے میں پولیس اسٹیشن کٹھوعہ میں این ڈی پی ایس ایکٹ کے متعلقہ دفعات کے تحت زیر ایف آئی آر نمبر 571/2025 ایک مقدمہ درج کیا گیا اور مزید تحقیقات شروع کی گئیں۔
انہوں نے لوگوں سے اپیل کی کہ وہ منشیات سے متعلق سرگرمیوں کے بارے میں پولیس کو مطلع کریں۔
