سری نگر کے کرفلی محلے میں ہولناک آتشزدگی، کم از کم 10 مکان خاکستر

سری نگر: سری نگر کے حبہ کدل علاقے کے گنجان آبادی والے کرفلی محلے میں دوران شب آتشزدگی کے ایک ہولناک واقعے میں کم از کم 10 رہائشی مکان خاکستر ہوگئے جس نے ایک درجن سے زیادہ کنبوں کو بے گھر کر دیا۔
ذرائع نے بتایا کہ حبہ کدل کے کرفلی محلے میں بدھ اور جعمرات کی درمیانی شب ایک مکان سے آگ نمودار ہوئی جس کے شعلوں نے چشم زدن میں متصل واقع مکانوں کو اپنی لپیٹ میں لے لیا۔
انہوں نے کہا کہ اس بھیانک آگ کی وجہ سے علاقے میں خوف کا ماحول پھیل گیا اورخواتین اور بچوں کو روتے بلکتے ہوئے دیکھا گیا اور آگ کے شعلے اور دھواں اس قدر بلند تھا کہ دور دور سے اس کو دیکھا جا سکتا تھا۔
محکمہ فائر اینڈ ایمرجنسی کے ایک عہدیدار نے واقعے کی تصدیق کرتے ہوئے کہا کہ رات کے قریب 2 بجے اس آتشزدگی کے بارے میں اطلاع موصول ہوئی۔
انہوں نے کہا کہ طلاع ملتے ہی شہر کے مختلف فائر اسٹیشنوں سے 17 فائر ٹنڈرس کو جائے موقع پر روانہ کر دیا گیا۔
ان کا کہنا تھا کہ فائر ٹنڈرس کی سخت محنت کے بعد آگ کو قابو میں کر لیا گیا تاہم اس واقعے میں کم سے کم 10 رہائشی مکان خاکستر ہوگئے۔
انہوں نے کہا کہ آگ لگنے کی وجہ معلوم کی جا رہی ہے تاہم کسی جانی نقصان کی کوئی اطلاع نہیں ہے۔
قابل ذکر ہے کہ وادی میں گذشتہ دنوں کے دوران آتشزدگی کے واقعات میں اضافہ دیکھا جا رہا ہے۔
دو دن قبل اسی علاقے میں کم از کم 7 مکان خاکستر ہوئے تھے۔
جموں و کشمیر فائر اینڈ ایمرجنسی سروسز نے سردیوں کے موسم میں آگ لگنے کے بڑھتے ہوئے واقعات کے پیش نظر عوام کے لیے ایک اہم ایڈوائزری جاری کی ہے، جس میں شہریوں سے احتیاطی تدابیر اپنانے اور چوکسی برقرار رکھنے کی اپیل کی گئی ہے۔
ایڈوائزری میں کہا گیا ہے کہ سردیوں میں ہیٹنگ آلات اور گیس اسٹوو وغیرہ کے زیادہ استعمال کے سبب اکثر آگ لگنے کے واقعات پیش آتے ہیں، لہٰذا عوام کو چاہئے کہ وہ درج ذیل ہدایات پر سختی سے عمل کریں۔
محکمہ نے ہدایت دی ہے کہ تمام برقی ہیٹنگ آلات، بخاری، اور ایل پی جی گیس اسٹوو کو سونے سے قبل یا گھر سے نکلنے سے پہلے بند کر دیا جائے۔ اسی طرح کانگڑی کا استعمال احتیاط سے کیا جائے اور رات کے وقت اسے محفوظ جگہ پر رکھا جائے تاکہ کسی حادثے کا خدشہ نہ رہے۔