جموں: مرکزی وزیر ڈاکٹر جیتندرا سنگھ کا کہنا ہے کہ ادھم پور سے آگے سڑک کے رابطے کی عدم موجودگی میں ضروری سامان لے جانے کے لئے خصوصی انتظامات کیے گئے ہیں۔
انہوں نے کہا کہ اودھم پور میں تھاڈ اور بالی نالے میں سری نگر – جموں قومی شاہراہ کو صاف کرنے کے لئے جنگی بنیادوں پر کام جاری ہے۔موصوف مرکزی وزیر نے ان باتوں کا اظہار پیر کو ‘ایکس’ پر اپنے ایک پوسٹ میں کیا۔
انہوں نے کہا: ‘ آج موسم صاف دکھائی دے رہا ہے، اور نیشنل ہائی وے اتھارٹی آف انڈیا (این ایچ اے آئی) کے حکام تھاڈ اور بالی نالہ پر قومی شاہراہ کی بندش کو ختم کرنے کے لیے چوبیس گھنٹے کام میں مصروف ہیں’۔انہوں نے امید ظاہر کی ہے کہ دیر شام تک، ٹریفک کی نقل و حرکت کی اجازت ممکن ہے۔ڈاکٹر سنگھ نے کہا کہ اودھم پور سے آگے سڑک کے رابطے کی عدم موجودگی میں، کٹرا سے رام بن سنگلدان تک نئی متعارف کرائی گئی خصوصی مقامی مسافر ٹرین میں ضروری سامان لے جانے کے انتظامات کیے گئے ہیں۔
انہوں نے کہا کہ یہ ضروری سامان وہاں سے سڑک کے ذریعے ڈوڈہ اور کشتواڑ کے اضلاع میں بھی لے جایا جا سکتا ہے۔
واضح رہے کہ گذشتہ ہفتے ہونے والی مسلسل بارشوں کے نتیجے میں آنے والے سیلابی صورتحال نے جموں وکشمیر کے کئی علاقوں میں معمولات زندگی درہم و برہم کر دئے۔
سیلابی صورتحال کا زیادہ اثر جموں صوبے میں رہا جہاں کئی علاقوں کی رابطہ سڑکیں منقطع ہوئیں جس سے لوگوں کو گونا گوں مشکلات کا سامنا کرنا پڑا۔
وادی کو ملک کے باقی حصوں کے ساتھ جوڑنے والی سری نگر – جموں قومی شاہراہ پر بھی گذشتہ کم وبیش دو ہفتوں سے ٹریفک کی نقل و حمل متاثر ہے۔
تاہم وادی کو جموں صوبے راجوری اور پونچھ اضلاع کے ساتھ جوڑنے والے تاریخی مغل روڈ اور لداخ کے ساتھ جوڑنے والی سری نگر- لیہہ شاہراہ پر ٹریفک کی نقل وحمل جاری ہے۔
