سری نگر،: جموں و کشمیر میں موسمی صورتحال بتدریج بہتر ہو رہی ہے اور اس دوران محکمہ موسمیات نے پیش گوئی کی ہے کہ یونین ٹریٹری میں 12 ستمبر تک موسم میں کسی خاص تبدیلی کا کوئی امکان نہیں ہے۔
محکمے نے اپنی ایڈوائزری میں لوگوں سے دریائوں، ندی نالوں اور کمزور تعمیراتی ڈھانچوں کے نزدیک جانے سے پرہیز کرنے کا مشورہ دیا ہے جبکہ کسانوں سے کہا گیا ہے کہ وہ 9 ستمبر کے بعد اپنے کھیت کھلیانوں اور باغوں میں کام شروع کریں۔
متعلقہ محکمے کے ایک ترجمان نے بتایا کہ جموں وکشمیر میں 6 ستمبر کو کہیں کہیں گرج چمک کے ساتھ ہلکی بارشوں کا امکان ہے۔انہوں نے کہا کہ 7 اور 8 ستمبر کو جموں وکشمیر میں کچھ مقامات پر گرج چمک کے ساتھ ہلکی بارشیں ہوسکتی ہیں جبکہ جموں صوبے کے کچھ اضلاع میں صبح اور شام کے وقت درمیانی درجے کی بارشوں کا امکان ہے۔موصوف ترجمان نے بتایا کہ بعد میں 9 سے 12 ستمبر تک کہیں کہیں گرج چمک کے ساتھ ہلکی بارشوں کے مرحلے متوقع ہیں۔
انہوں نے کہا کہ جموں وکشمیر میں مجموعی طور پر 12 ستمبر تک کسی موسم میں کسی خاص تبدیلی کا کوئی امکان نہیں ہے۔محکمے نے اپنی ایڈوائزری میں کہا کہ جموں وکشمیر میں کہیں کہیں لینڈ سلائیڈنگ اور چٹانیں کھسک آنے کے بھی خطرات ہیں۔
ایڈوائزری میں لوگوں سے دریائوں، ندی نالوں اور کمزور تعمیراتی ڈھانچوں کے نزدیک جانے سے پرہیز کرنے کا مشورہ دیا ہے جبکہ کسانوں سے کہا گیا ہے کہ وہ 9 ستمبر کے بعد اپنے کھیت کھلیانوں اور باغوں میں کام شروع کریں۔
دریں اثنا وادی میں ہفتے کی صبح سے ہی مطلع جزوی طور پر ابر آلود لیکن موسم خشک رہا۔
