سری نگر: جموں و کشمیر کے وزیر اعلیٰ عمر عبداللہ نے جمعہ کی صبح سیلاب کے بعد کے منظر نامے کا جائزہ لینے کے لئے ایک اہم میٹنگ کی صدارت کی۔
انہوں نے اس دوران حساس مقامات کو مزید تقویت دینے، سیلاب زدہ دیہاتوں سے لوگوں کو نکالنے اور کنٹرول رومز کے ذریعے چوبیس گھنٹے نگرانی کرنے کی ہدایت دی۔وزیر اعلیٰ نے لوگوں سے ہوشیار رہنے اور انتظامیہ کے ساتھ تعاون کرنے کی اپیل کی۔
واضح رہے کہ مسلسل بارشوں کی وجہ سے دریائوں اور ندی نالوں میں پانی کی سطح بڑھنے سے وادی کشمیر کے کئی علاقے زیر آب آگئے۔
تاہم جمعہ کو دریائے جہلم میں سنگم اور رام منشی باغ پر پانی کی سطح کم ہوئی ہے اور دیگر نالوں میں بھی پانی کی سطح میں کمی ریکارڈ ہو رہی ہے۔
وزیر اعلیٰ کے ‘ایکس’ ہینڈل پر جمعہ کو ایک پوسٹ میں کہا گیا: ‘ وزیراعلیٰ نے آج صبح سیلاب کے بعد کے منظر نامے پر ایک میٹنگ کی صدارت کی اور انہوں نے حساس مقامات کو مزید تقویت دینے، سیلاب زدہ دیہاتوں سے لوگوں کو نکالنے، کنٹرول رومز کے ذریعے چوبیس گھنٹے نگرانی کرنے اور متاثرہ علاقوں کا بار بار دورہ کرنے اور رہائشیوں سے الرٹ رہنے، خوف و ہراس سے بچنے اور انتظامیہ کے ساتھ تعاون کرنے کی ہدایت کی’۔
پوسٹ کے مطابق انہوں نے بجلی، پانی کی فراہمی اور سڑک کے رابطے سمیت ضروری خدمات کی تیزی سے بحالی پر بھی زور دیا۔
وزیر اعلیٰ نے گذشتہ روز میڈیا کو بتایا کہ 2014 کے تباہ کن سیلاب کے بعد وادی کو محفوظ بنانے کے لیے کوئی سنجیدہ قدم نہیں اٹھایا گیا اور گزشتہ 11 برس ضائع کر دیے گئے۔
انہوں نے واضح کیا کہ اگر دریائے جہلم اور اس کے فلڈ چینل کی کھدائی کی جاتی تو آج یہ صورتحال پیش نہ آتی۔
