سری نگر،: وسطی ضلع بڈگام کے زونی پورہ گاؤں کے قریب جمعرات کی علی الصبح دریائے جہلم کے باندھ میں ایک بڑا دراڈ ہونے کے نتیجے میں ملحقہ علاقے زیر آب آگئے ہیں۔
حکام نے دریائے جہلم میں ہوئے اس شگاف کی وجہ سے لسجن، سویہ ٹینگ، نوگام، ویتھہ پورہ، گوپال پورہ، پادشاہی باغ اور مہجور نگر علاقوں کے لوگوں سے محفوظ مقامات کی طرف منتقل ہونے کا مشورہ دیا ہے۔
ایک سرکاری بیان میں کہا گیا ہے کہ لسجن، سویہ ٹینگ، نوگام، ویتھ پورہ، گوپال پورہ، پادشاہی باغ، اور مہجور نگر کے رہائشیوں کو فوری طور پر نقل مکانی کرنے کا مشورہ دیا گیا ہے۔
انہوں نے کہا کہ ضلعی انتظامیہ سری نگر نے اطلاع دی ہے کہ شالینہ بڈگام میں دریائے جہلم کے باندھ میں شگاف کی وجہ سے مذکورہ علاقوں کے رہائشیوں کو مشورہ دیا گیا ہے کہ وہ احتیاطی اقدام کے طور پر محفوظ مقامات پر منتقل ہو جائیں۔
حکام نے بتایا کہ جمعرات کی صبح مقامی کمیٹیوں، مساجد اور ریونیو اور پولیس حکام کے ذریعے اعلانات کرائے گئے جن میں رہائشیوں سے کہا گیا کہ وہ چوکس رہیں لیکن گھبرانے کی کوئی ضرورت نہیں ہے۔
دریں اثنا حکام نے بتایا کہ دریائے جہلم اور اس کی شاخوں میں پانی کی سطح میں بتدریج کمی واقع ہو رہی ہے۔
محکمہ آبپاشی اور فلڈ کنٹرول کے مطابق دریائے جہلم کے اہم مانیٹرنگ مقامات پر صبح 6 بجے سے پانی کی سطح میں کمی واقع ہونا شروع ہوئی۔انہوں نے کہا کہ دریائے کی دیگر کئی شاخوں میں بھی پانی کی سطح کم ہو رہی ہے۔
