جموں،: جموں و کشمیر کے لیفٹیننٹ گورنر منوج سنہا نے ریاسی اور رام بن اضلاع میں لینڈ سلائیڈنگ اور بادل پھٹنے کے واقعات سے انسانی جانوں کے زیاں پر گہرے افسوس کا اظہار کیا ہے۔
واضح رہے کہ ریاسی کے ایک دور افتادہ بھدر گاؤں میں موسلا دھار بارش سے گر آنے والے ایک بھاری بھر کم مٹی کے تودے نے ایک کچے مکان کو اپنی زد میں لے لیا جس کے نتیجے میں ایک ہی خاندان کے سات افراد کی ہلاکت کا خدشہ ہے جبکہ رام بن کے راج گڑھ تحصیل کے ایک گائوں میں بادل پھٹنے سے 3 افراد کی موت جبکہ 2 لاپتہ ہوئے ہیں۔
منوج سنہا نے ان دونوں واقعات پر گہرے رنج کا اظہار کیا۔انہوں نے ‘ایکس’ پر اپنے ایک پوسٹ میں کہا: ‘ ریاسی اور رام بن اضلاع میں بادل پھٹنے اور بارش کی وجہ سے لینڈ سلائیڈنگ ہونے سے دکھ ہوا’۔
انہوں نے سوگوار کنبوں کے ساتھ تعزیت کی۔ان کا کہنا تھا: ‘ اعلیٰ حکام سے بات کی اور صورتحال کا جائزہ لیا، ریسکیو اور ریلیف آپریشن جاری ہے’۔منوج سنہا نے کہا کہ متاثرین کو ہر ممکن مدد فراہم کی جا رہی ہے۔
