غزہ،: غزہ کی پٹی میں اسرائیلی فوج کے حملوں میں اتوار کو 42 فلسطینی مارے گئے، یہ اطلاع غزہ کے شہری دفاع نے دی۔شہری دفاع کے ترجمان محمود بسال نے ژنہوا کو بتایا کہ غزہ شہر میں بیپٹسٹ اسپتال کے قریب اسرائیلی گولہ باری میں سات افراد ہلاک ہوئے اور شہر کے جنوب مشرق میں زیتون میں ایک مکان پر اسرائیلی گولہ باری سے ایک شخص ہلاک ہوا۔
ترجمان نے کہا کہ خان یونس کے مغرب میں بے گھر افراد کے لیے بنائے گئے خیمے پر اسرائیلی فضائی حملے میں چار افراد ہلاک ہو گئے۔بسال کے مطابق خان یونس کے مختلف علاقوں میں اسرائیلی فضائی حملوں میں 12 فلسطینی جاں بحق ہوئے جبکہ وسطی غزہ کی پٹی کے شہر دیر البلاح میں دو الگ الگ فضائی حملوں میں تین افراد مارے گئے۔
ترجمان نے بتایا کہ وسطی اور جنوبی غزہ کی پٹی میں امداد کے منتظر 15 فلسطینی اسرائیلی فوج کی فائرنگ سے ہلاک ہوگئے۔ ان واقعات پر اسرائیلی فوج کی جانب سے فوری طور پر کوئی تبصرہ نہیں کیا گیا۔
اتوار کو غزہ میں صحت کے حکام کے جاری کردہ اعدادوشمار کے مطابق 18 مارچ کو اسرائیل کی جانب سے دوبارہ فوجی آپریشن شروع کرنے کے بعد سے اب تک کم از کم 10400 فلسطینی ہلاک اور 43845 زخمی ہو چکے ہیں، جب کہ اکتوبر 2023 میں جنگ شروع ہونے کے بعد سے غزہ میں 61944 افراد ہلاک اور 155886 زخمی ہو چکے ہیں۔
دریں اثنا، غزہ کے صحت کے حکام نے بتایا کہ غزہ کے اسپتالوں میں گزشتہ 24 گھنٹے کے دوران بھکمری اور غذائی قلت سے سات اموات ہوئی ہیں، جن میں دو بچے بھی شامل ہیں۔ اس کے ساتھ ہی اکتوبر 2023 تک بھوک اور غذائی قلت سے ہونے والی اموات کی کل تعداد 258 ہو گئی، جن میں 110 بچے بھی شامل ہیں۔
یواین آئی
