جموں: محکمہ موسمیات کی پیش گوئی کے عین مطابق جموں وکشمیر میں گذشتہ چوبیس گھنٹوں سے بارشوں کا سلسلہ وقفے وقفے سے جاری ہے اور کچھ علاقوں میں تیز جبکہ کچھ علاقوں میں درمیانی درجے کی بارشیں ہو رہی ہیں۔
متعلقہ محکمے کے ایک ترجمان نے بتایا کہ جموں وکشمیر میں19 اگست تک کئی مقامات پر گرج چمک کے ساتھ ہلکی سے درمیانی درجے کی بارشوں کا امکان ہے۔انہوں نے کہا کہ اس دوران جموں وکشمیر کے کچھ علاقوں میں شدیدبارشوں کا امکان ہے جبکہ اس دوران کہیں کہیں تیز ہواؤں کے ساتھ تیز بارشیں ہوسکتی ہیں۔ان کا کہنا ہے کہ بعد ازاں 23 سے 25 اگست تک ہلکی سے درمیانی درجے کی بارشوں کا ایک اور مرحلہ متوقع ہے۔
محکمے نے اپنی ایڈوائزری میں کہا کہ جموں و کشمیر کے کچھ علاقوں میں 19 اگست تک بھاری اور تیز بارشوں کا امکان ہے اور اس دوران کہیں کہیں بادل پھٹنے، سیلابی ریلے آنے، لینڈ سلائیڈنگ ہونے اور پتھر کھسک آنے کے بھی خطرات ہیں۔لوگوں سے ندی نالوں، دریاؤں اور کمزور تعمیراتی ڈھانچوں کے نزدیک جانے سے احتراز کرنے کی اپیل کی گئی ہے۔ایڈوائزری میں مسافروں سے کہا گیا ہے کہ وہ موسمی صورتحال کے مطابق اپنے سفر کا منصوبہ بنائیں۔
کشمیر ویتھر کے مطابق مانسون اور مغربی ہوائوں کے اتصال کے نتیجے میں اگلے 24 گھنٹوں کے دوران جموں و کشمیر میں وسیع پیمانے پر بارشوں کا امکان ہے۔ان کا کہنا تھا: ‘ کچھ ماڈل تجویز کرتے ہیں کہ بانڈی پورہ، گاندربل اور سری نگر اضلاع کے آس پاس کے علاقے میں تیز بارشیں ہوسکتی ہیں لہٰذا سیلابی ریلوں کو خارج از امکان قرار نہیں دیا جاسکتا ہے’۔
دریں اثنا حکام نے موسمی صورتحال کے تعلق سے ایڈوائزیز جاری ہیں جن میں لوگوں سے احتیاط برتنے کی تاکید کی گئی ہے۔جموں صوبے میں شدید بارشوں اور خراب موسمی حالات کے پیشِ نظر ڈائریکٹوریٹ آف اسکول ایجوکیشن جموں نے اعلان کیا ہے کہ آج یعنی 18 اگست کو تمام سرکاری و نجی اسکول بند رہیں گے۔
