جموں: شری امرناتھ جی یاترا بحسن و خوبی جاری رہتے ہوئے جمعہ کی صبح 2 ہزار 8 سو سے زیادہ یاتریوں کا ایک اور قافلہ 117 چھوٹی بڑی گاڑیوں میں سخت سیکورٹی حصار کے بیچ کشمیر کے لئے روانہ ہوا۔سرکاری ذرائع نے بتایا کہ بھگوتی نگر بیس کیمپ سے جمعہ کی صبح 2 ہزار 8 سو 6 یاتریوں پر مشتمل ایک اور قافلہ کشمیر کے لئے روانہ ہوا۔انہوں نے کہا کہ ان یاتریوں میں سے 2 ہزار 1 سو 6 یاتری 75 گاڑیوں میں جنوبی کشمیر کے ضلع اننت ناگ میں واقع ننون پہلگام بیس کیمپ جبکہ 7 سو 90 یاتری 42 گاڑیوں میں وسطی کشمیر کے ضلع گاندربل میں واقع بالتل کیمپ کے لئے روانہ ہوئے۔
حکام کے مطابق گذشتہ 22 دنوں کے دوران ساڑھے تین لاکھ سے زیادہ یاتری پوتر گھپا کے درشن سے فیضیاب ہوئے ہیں۔امسال 38 دنوں کو محیط یہ یاترا 9 اگست کو رکشا بندھن کے موقع پر اختتام پذیر ہوگی۔جموں وکشمیر کے لیفٹیننٹ گورنر منوج سنہا نے 2 جولائی کو یاتریوں کے پہلے قافلے کو بھگوتی نگر بیس کیمپ سے جھنڈی دکھا کر روانہ کیا تھا۔
