سری نگر: پی ڈی پی کے سینئر لیڈر اور رکن اسمبلی وحید پرہ نے نیشنل کانفرنس قیادت والی جموں وکشمیر حکومت کو ہدف تنقید بناتے ہوئے کہا ہے کہ زمینیوں کی نئی ڈیجیٹائزیشن کے لئے اردو کو ‘جان بوجھ کر’ ہٹایا جا رہا ہے اور اس کی جگہ انگریزی کو لگایا جا رہا ہے۔انہوں نے کہا کہ اردو ایک ایسی زبان ہے جو نسلوں سے ہمارے ریونیو ریکارڈ کا لازمی حصہ رہی ہے۔
موصوف لیڈر نے یہ باتیں ہفتے کو ‘ایکس’ پر اپنے ایک پوسٹ میں کیں۔انہوں نے کہا: ‘نیشنل کانفرنس جس میں عمر عبداللہ وزیر اعلیٰ کے عہدے پر براجمان ہیں، نے ایک بار بھر جموں وکشمیر بھر میں زمینوں کے ریکارڈ کو ڈیجیٹلائز کرنے کا عمل شروع کیا ہے’انہوں نے کہا: ‘اس بار یہ عمل صرف انگریزی زبان میں انجام دیا جا رہا ہے جبکہ اردو کو مکمل طور پر خارج کر دیا گیا ہے، جو نسلوں سے ہمارے ریونیو ریکارڈ کا لازمی حصہ رہی ہے’۔
ان کا پوسٹ میں سوالیہ انداز میں کہنا تھا: ‘ اردو جو جموں و کشمیر کی سرکاری زبانوں میں سے ایک ہے، کو نیشنل کانفرنس حکومت کی طرف سے ڈیجیٹلائزیشن کی نئی کوششوں سے جان بوجھ کر کیوں مٹایا جا رہا ہے’۔
