جموں: جموں و کشمیر کے ضلع ڈوڈہ کے پونڈا علاقے میں منگل کی صبح ایک سڑک حادثے میں خاتون سمیت 5 افراد کی موت جبکہ 19 دیگر زخمی ہوگئے۔
ذرائع نے بتایا کہ ڈوڈہ کے پونڈا علاقے میں ڈوڈہ – براتھ روڈ پر منگل کی صبح ایک ٹیمپو زیر رجسٹریشن نمبر جے کے06 – 4847 سڑک سے پھسل کر ایک گہری کھائی میں گر گیا۔
مرکزی وزیر ڈاکٹر جیتندر سنگھ نے اس حادثے کے بارے میں ایکس پر اپنی ایک پوسٹ میں اطلاع فراہم کرتے ہوئے کہا کہ اس گاڑی میں کل 24 افراد سوار تھے جن میں سے 5 کی موت واقع ہوئی ہے جبکہ 19 دیگر زخمی ہوئے ہیں۔
انہوں نے بتایا کہ زخمیوں میں سے 2 کی حالت نازک بتائی جا رہی ہے۔
متوفین کی شناخت محمد اشرف ولد محمد اسداللہ وانی ساکن اوول، منگتہ وانی ولد غلام وانی، اوول، عطا محمد و؛د غلام محمد ساکن بالی دھر، طارق حسین ولد عبدالجبار نائیک ساکن اوول اور رفیقہ بیگم ساکن اوول کے طور پر کی گئی۔مرکزی وزیر نے کہا کہ تمام تر امداد فراہم کی جا رہی ہیں اور وہ خود مقامی ضلع انتظامیہ کے ساتھ مسلسل رابطے میں ہیں۔
اس سے قبل انہوں نے اس واقعے پر اظہار افسوس کرتے ہوئے ایکس پر اپنی ایک پوسٹ میں کہا ’ ڈوڈہ شہر سے تقریباً 20 سے 25 کلومیٹر دور بھرت گاؤں کے قریب ایک پرائیویٹ ٹیمپو کے سڑک حادثے کا شکار ہونے کی اطلاع ملنے پر ڈی سی ڈوڈہ، ہرویندر سنگھ جی سے بات کی ہے۔
انہوں نے کہا ’’اب تک تین افراد کی موت اور 4 کے شدید زخمی ہونے کی اطلاع ہے۔‘‘
پوسٹ میں انہوں نے مزید کہا ’تمام ممکن مدد اور طبی امداد فراہم کی جا رہی ہے، ڈی سی خود صورتحال کی نگرانی کر رہے ہیں اور مجھے اپڈیٹس دے رہے ہیں، ہر ضروری مدد فراہم کی جائے گی‘۔
