سری نگر: جموں و کشمیر کے لیفٹیننٹ گورنر منوج سنہا نے پیر کے روز کہا کہ پاکستان ایک دہشت گرد ملک کے طور پر جموں و کشمیر کی ترقی کو پٹری سے اتارنے اور عوام کے درمیان نفاق پیدا کرنے کی سازشوں میں مصروف ہے۔لیفٹیننٹ گورنر نے یہ بات اننت ناگ کے لارکی پورہ عیشمقام میں ایک مذہبی تقریب سے خطاب کے دوران کہی۔ انہوں نے کہا:’پاکستان جموں و کشمیر میں گزشتہ پانچ برسوں کے دوران حاصل کی گئی ترقی کو تباہ کرنا چاہتا ہے۔ وہ ہماری اجتماعی یکجہتی کو توڑنا چاہتا ہے۔ ہمیں اس کی ان سازشوں کو ہرگز کامیاب نہیں ہونے دینا چاہیے۔‘انہوں نے کہا کہ دشمن کی ان ناپاک چالوں کو شکست دینے کا واحد راستہ مل کر مزاحمت کرنا اور اتحاد برقرار رکھنا ہے۔
منوج سنہا نے مزید کہا کہ ہم سب کو مل کر اس دہشت گرد ملک کے عزائم کے خلاف لڑنا ہوگا۔ پولیس اور سیکورٹی فورسز اس جنگ میں کلیدی کردار ادا کر رہی ہیں، لیکن عوامی تعاون بھی اتنا ہی اہم ہے۔
لیفٹیننٹ گورنر نے اس بات پر زور دیا کہ انتظامیہ امن و ترقی کے لیے پرعزم ہے، مگر یہ ہدف عوامی شرکت اور تعاون کے بغیر ممکن نہیں۔ہمیں اپنی پولیس اور سیکورٹی ایجنسیوں کو بروقت اطلاعات فراہم کرنی ہوں گی تاکہ دہشت گردی کی جڑوں کو مکمل طور پر اکھاڑا جا سکے۔ایل جی نے جہاں سیکورٹی اہلکاروں کی قربانیوں کو سراہا، وہیں عوام کے صبر و تحمل کی بھی تعریف کی۔
