ایران اور اسرائیل کے درمیان جنگ بندی نافذ ہو چکی ہے، اس کی خلاف ورزی نہ کریں: ڈونلڈ ٹرمپ

امریکی صدر ڈونلڈ ٹرمپ نے ابھی ابھی ٹروتھ سوشل پر لکھا ہے ’جنگ بندی اب نافذ العمل ہے۔ پلیز اس کی خلاف ورزی نہ کریں۔‘

یاد رہے کہ اسرائیل نے تاحال اس جنگ بندی کو سرکاری طور پر قبول نہیں کیا جبکہ ایران کے سرکاری ٹیلی ویژن نے چند گھنٹے قبل اعلان کیا تھا کہ اسرائیل پر جنگ بندی نافذ ہو چکی ہے۔

ایران اور اسرائیل کے درمیان جنگ بندی کے اعلان کے بارے میں امریکی صدر ڈونلڈ ٹرمپ کی ٹروتھ سوشل پر کل رات ایک پوسٹ میں کہا گیا کہ جنگ بندی اعلان کے تقریباً چھ گھنٹے بعد شروع ہو جائے گی۔ اب وہ وقت شروع ہو چکا ہے۔

ٹرمپ نے پیر کو واشنگٹن کے مقامی وقت کے مطابق شام چھ بجے لکھا: اسرائیل اور ایران کے درمیان مکمل جنگ بندی پر اتفاق ہو چکا ہے۔ ٹرمپ کا کہنا تھا کہ جنگ بندی کا آغاز ’تقریباً چھ گھنٹے بعد‘ ہو جائے گا جب دونوں ممالک اپنی فوجی کارروائیاں ’ختم‘ کر دیں گے۔

اب وہ وقت شروع ہو چکا ہے اور اس دوران ایران نے اسرائیل پر کئی میزائل داغے ہیں جس میں اسرائیلی ایمرجنسی حکام کے مطابق کم از کم تین افراد ہلاک اور متعدد زخمی ہو گئے ہیں۔

اسرائیلی فوج کا کہنا ہے کہ تنازع کے آغاز کے بعد سے یہ سب سے شدید ایرانی میزائل حملے تھے۔تاہم اسرائیل نے ابھی تک جنگ بندی کی تجویز کو عوامی طور پر قبول نہیں کیا ہے جب کہ ایران کے سرکاری ٹیلی ویژن نے چند گھنٹے قبل اعلان کیا تھا کہ اسرائیل پر جنگ بندی نافذ ہو چکی ہے۔