ہندوستانی سفارت خانہ نیپال میں پھنسے ہندوستانیوں کی بحفاظت واپسی کے انتظامات کر رہا ہے

کھٹمنڈو/نئی دہلی،: نیپال کے کھٹمنڈو میں ہندوستانی سفارت خانہ مسلسل بارشوں اور لینڈ سلائیڈنگ کی وجہ سے یہاں پھنسے ہندوستانی شہریوں کی بحفاظت واپسی کے انتظامات کر رہا ہے۔
کھٹمنڈو میں ہندوستانی سفارت خانے نے پیر کو کہا کہ اسے خراب موسم کی وجہ سے ہمالیائی ملک میں پھنسے ہوئے ہندوستانی شہریوں کے بارے میں اطلاع ملی ہے۔
ایک ایڈوائزری میں ہندوستانی سفارت خانے نے کہا کہ وہ کچھ ہندوستانی گروپوں کے ساتھ رابطے میں ہے اور ان کی محفوظ واپسی کے انتظامات کر رہا ہے۔ سفارت خانے نے یہ بھی کہا کہ وہ پھنسے ہوئے ہندوستانی شہریوں کو نکالنے میں نیپالی حکام کے ساتھ تال میل کر رہا ہے۔
ایڈوائزری میں کہا گیا کہ "ہفتے کے آخر میں ریکارڈ بارش نے سیلاب اور لینڈ سلائیڈنگ کی وجہ سے بڑے پیمانے پر نقصان پہنچایا ہے۔” ہماری ہمدردی تمام متاثرہ افراد کے ساتھ ہے۔” نیپال میں رہنے والے ہندوستانی شہری جنہیں مدد کی ضرورت ہے وہ ہنگامی نمبروں +977-9851316807، +977-9851107021 اور +977-9749833292 پر رابطہ کر سکتے ہیں۔
نیپال پولیس کے مطابق گزشتہ جمعرات سے شروع ہونے والی بارشوں کے نتیجے میں آنے والے سیلاب اور لینڈ سلائیڈنگ سے مرنے والوں کی تعداد 200 سے تجاوز کر گئی ہے اور 26 افراد تاحال لاپتہ ہیں جب کہ امدادی کارروائیوں سے 4 ہزار 222 افراد کو بچا لیا گیا ہے۔ متاثرہ علاقوں میں کم از کم 127 افراد زخمی ہوئے ہیں۔ انفراسٹرکچر کو کافی نقصان پہنچا ہے۔ لینڈ سلائیڈنگ اور سیلاب کی وجہ سے کئی سڑکیں بند ہو گئی ہیں، جس سے آمدورفت اور امدادی کارروائیوں میں شدید مشکلات کا سامنا ہے۔