نئی دہلی: وزیر اعظم نریندر مودی نے ہفتہ کو خواتین کے خلاف جرائم کے معاملات میں جلد انصاف کی ضرورت پر زور دیا اور کہا کہ خواتین کے خلاف مظالم معاشرے کے لیے سنگین تشویش کا باعث ہیں۔
آج یہاں بھارت منڈپم میں سپریم کورٹ کے زیر اہتمام ضلعی عدلیہ کی دو روزہ قومی کانفرنس سے خطاب کرتے ہوئے مسٹر مودی نے کہا ’’ملک میں کئی ایسے قوانین ہیں جو خواتین کی حفاظت کے امور سے متعلق ہیں۔ سال 2019 میں، فاسٹ ٹریک خصوصی عدالتوں کے لیے ایک قانون منظور کیا گیا، جس کے تحت گواہوں کے بیان کے مراکز بنائے گئے۔ ہمیں اس بات کو یقینی بنانا چاہیے کہ ان مراکز کو مزید مضبوط کیا جائے تاکہ خواتین کی حفاظت سے متعلق معاملات میں جلد فیصلے کیے جا سکیں۔‘‘
انہوں نے کہا کہ انصاف میں تاخیر کے ختم کرنے کے لیے گزشتہ دہائی میں کئی سطحوں پر کام کیا گیا ہے۔ پچھلے 25 سالوں میں جوڈیشل انفراسٹرکچر پر خرچ کی گئی رقم کا 75 فیصد، تقریباً 8000 کروڑ روپے، صرف پچھلے 10 سالوں میں خرچ ہوئے ہیں۔ انہوں نے کہا کہ ہندوستان کے عوام نے کبھی بھی عدلیہ اور سپریم کورٹ کے 75 سالوں پر عدم اعتماد نہیں کیا کیونکہ جمہوریت کی ماں ملک کے فخر کو مزید بڑھاتی ہے۔
جمہوریت میں عدلیہ کے رول پر روشنی ڈالتے ہوئے انہوں نے کہا کہ عدلیہ کو آئین کی محافظ تصور کیا جاتا ہے اور یہ بذات خود ایک بہت بڑی ذمہ داری ہے۔ انہوں نے کہا کہ ہم اطمینان کے ساتھ کہہ سکتے ہیں کہ عدالت عظمیٰ نے اس ذمہ داری کو نبھانے کی بہترین کوشش کی ہے۔
اس موقع پر مسٹر مودی نے سپریم کورٹ آف انڈیا کے قیام کے 75 سال مکمل ہونے کی یاد میں ڈاک ٹکٹ اور سکے کی رونمائی کی۔ پروگرام میں ملک بھر کی ضلعی عدلیہ کے شرکاء نے شرکت کی۔
یو این آئی
