واشنگٹن/نئی دہلی: امریکی محکمہ خارجہ کے نائب ترجمان ویدانت پٹیل نے کہا ہے کہ ہندوستان اور امریکہ کے تعلقات پہلے سے زیادہ مضبوط ہوئے ہیں۔
ہندوستان گرچہ ایران اور روس کے ساتھ تعلقات کو آگے بڑھا رہا ہے، لیکن امریکہ اہم شعبوں میں خاص طور پر اقتصادی تعلقات اور سیکورٹی تعاون میں اس کے (ہندوستان) کے ساتھ اپنے تعلقات کو مضبوط بنا رہا ہے۔

جب مسٹر پٹیل سے پوچھا گیا کہ ایران اور روس کے ساتھ ہندوستان کے تعلقات کے تناظر میں امریکہ ہندوستان کے ساتھ اپنے گہرے تعلقات سے کیسے نمٹے گا، تو انہوں نے کہا، "… ہندوستان ایک ایسا ملک ہے جس کے ساتھ ہم کئی اہم شعبوں میں اپنے تعلقات کو گہرا کررہے ہیں۔ خاص طور پر جب یہ ہمارے اقتصادی تعلقات اور سیکورٹی تعاون کو مضبوط بنانے سے متعلق ہے۔ امریکی صدر کو چند ہفتے قبل جی7 میں وزیر اعظم نریندر مودی سے مختصر ملاقات کا موقع ملا تھا۔ لہذا یہ ایک ایسا علاقہ ہے جہاں ہم اس رشتے کو آگے بڑھاتے رہیں گے۔

گزشتہ سال جون میں وزیر اعظم مودی کے واشنگٹن کے ریاستی دورہ کے بارے میں بتاتے ہوئے مسٹر پٹیل نے کہا، "آپ اس حقیقت سے بے خبر نہیں ہیں کہ ہم نے گزشتہ موسم گرما میں مسٹر مودی کے ریاستی دورے کے لیے ہندوستان کی میزبانی کی تھی اور مجھے لگتا ہے کہ ایسے بہت سے اضافی شعبے ہوں گے جہاں ہم باہمی تعاون کو مضبوط بنانا جاری رکھیں گے۔ انہوں نے کہا کہ قومی سلامتی کے مشیر سلیوان نے ابھی چند ہفتے قبل ہندوستان کا دورہ کیا تھا۔

پاکستان سے متعلق ایک سوال کا جواب دیتے ہوئے مسٹر پٹیل نے دہشت گردی کی مذمت کی۔ انہوں نے کہا کہ بالآخر یہ ہندوستان اور پاکستان کا معاملہ ہے۔ انہوں نے کہا، "واضح طور پر، ہم کسی بھی ملک کا اپنے پڑوسیوں کے ساتھ زیادہ مثبت تعلقات رکھنے کا خیرمقدم کرتے ہیں، لیکن جیسا کہ یہ خاص طور پر اس سے متعلق ہے، میرے پاس کہنے کو کچھ نہیں ہے۔”

یواین آئی