نیوزڈیسک

سرینگر: جموں و کشمیر کے معروف اداکار، ہدایت کار اور ماہر تھیٹر فنکار مشتاق کاک کے انتقال پر مرکز ِ فکر وفن نے دکھ کا اظہار کیا ۔مرکز فکر وفن کے سرپرست اعلیٰ عبد الاحد فرہاد ،صدر رشید راہل ،جنرل سیکریٹری وترجمان اعلیٰ شوکت ساحل ،رکن حمید ناصر ،قیوم رفیع آبادی اور اشرف نثار نے مرحوم فنکار مشتاق کاک کوخراج عقیدت پیش کیا ۔ایک بیان میں ترجمان نے مشتاق کاک جموں وکشمیر کا عزیم فنکاروں میں شمار ہوتا ہے ،جنہوں نے فن اور فنکاری میں کارہائے نمایاں انجام دیئے ہیں ۔ان کا کہناتھا کہ مشتاق کاک کے انتقال سے شعبہ فن میں خلاءپیدا ہوگیا ہے ،جس کو پُر کرنا مشکل ہی نہیں بلکہ ناممکن ہے ۔سینئر صحافی آر سی گنجو نے مرحوم کی فنی صلاحیتوں ،کار کردگی اور گراں قدر خدمات انجام دینے پر کئی کالم قلمبند کئے ہیں ۔

یاد رہے کہ جموں و کشمیر کے معروف اداکار، ہدایت کار اور ماہر تھیٹر فنکار مشتاق کاک گزشتہ روز جموں میں انتقال ہوا۔62سال کے مشتاق کاک مہلک مرض کینسر کے عارضہ میں مبتلا تھے۔

مشتاق کاک کی آخری رسومات جموں میں ادا کی گئیں اور انہیں سدھارا قبرستان میں سپرد لحد کر دیا گیا۔ادھر مشتاق کاک کے انتقال پر جموں و کشمیر کی کئی ثقافتی و تمدنی انجمنوں کے ساتھ ساتھ ادبی حلقوں اور فنکار برادری نے گہرے رنج و غم کا اظہار کرتے ہوئے ان کی موت کو ڈرامائی دنیا خصوصاََ تھیٹر کے لئے ایک بہت بڑا نقصان قرار دیا ہے۔جموں میں پیدا ہوئے مشتاق کاک ”پرفارمنگ آرٹ“ کے میدان میں ایک ممتاز مقام رکھتے تھے۔

سنگیت ناٹک اکادمی سے انہیں ایوارڈ سے بھی نوازا گیا ہے۔ انہوں نے پانچ سال کے طویل عرصہ تک شری رام سینٹر، نئی دہلی کے ڈائریکٹر کے طور پر بھی خدمات انجام دی ہیں۔ اپنے شاندار کیریئر کے دوران مشتاق کاک نے تقریباً سو سے زائد ڈراموں کی ہدایت کاری کی، بالی ووڈ کی دو درجن فلموں میں اداکاری کی اور دور درشن کے لیے تیس ڈرامہ سیریز کی ہدایت کاری کی۔ حال ہی میں ریلیز ہوئی بالی ووڈ فیچر فلم ”غدر ۔2 “میں بھی انہوں نے نمایاں کردار ادا کیا ہے۔مشتاق کاک کے جنازے میں تھیٹر سے تعلق رکھنے والی شخصیات، ادیبوں، شاعروں، اداکاروں سمیت ان کے اعزہ و اقارب کی خاصی تعداد نے شرکت کی۔ وہیں سماجی رابطہ گاہوں خصوصاً ’ایکس اور فیس بک‘ پر بھی سیاسی، سماجی اور ادبی شخصیات نے مشتاق کاک کی وفات پر دکھ کا اظہار کیا ہے۔