یاتری یہاں سے محبت اور بھائی چارے کا پیغام لے کے جائیں گے: ڈاکٹر فاروق عبداللہ

سری نگر، 22 جون : نیشنل کانفرنس کے صدر اور سابق وزیر اعلیٰ ڈاکٹر فاروق عبداللہ کا کہنا ہے کہ شری امرناتھ جی پوتر گھپا کے یاتری یہاں سے محبت اور بھائی چارے کا پیغام لے کے جائیں گے۔
انہوں نے یاتریوں کے لئے کئے جانے والے انتظامات پر سرکار کا شکریہ ادا کیا۔
موصوف صدر نے جمعرات کو یاترا شروع ہونے سے قبل یاتریوں کے لئے کئے جانے والے انتظامات کا جائزہ لینے کے لئے پہلگام کا دورہ کیا۔
اس موقع پر انہوں نے میڈیا کو بتایا: ‘ہم سرکار کے مشکور ہیں کہ یاتریوں کے لئے اچھے انتظامات کئے گئے ہیں’۔
ان کا کہنا تھا: ‘یہاں ایک چھوٹا سا اچھا ہسپتال بھی ہے جس میں نرسوں کی کمی ہے جس کے لئے متعلقہ حکام کو چاہئے کہ وہ دوسرے ہسپتالوں سے نرسوں کو نکالنے کے بجائے ان نرسوں کو یہاں دو مہینوں کے لئے رکھیں جو گھروں میں بے کار بیٹھی ہیں تاکہ ان کو بھی روز گار ملے’۔
ڈاکٹر فاروق عبداللہ نے کہا کہ یاتری یہاں سے محبت اور بھائی چارے کا پیغام لے کے جائیں گے۔
انہوں نے کہا: ‘یہ وطن سب کا ہے کہ ہندو کا بھی سکھ کا بھی عیسائی کا بھی اور مسلمان کا بھی ہے’۔
ان کا مزید کہنا تھا کہ یہاں مسلمان ہمیشہ سے یاتریوں کی خدمت کرتے آئے ہیں۔
جنوبی کشمیر کے ہمالیہ پہاڑوں میں 3 ہزار 8 سو 80 میٹر کی بلندیوں پر واقع شری امر ناتھ مندر کی سالانہ یاترا یکم جولائی سے شروع ہوگی جو 31 اگست کو اختتام پذیر ہوگی۔
جموں وکشمیر انتظامیہ یاترا کے لئے تمام تر انتظامات کو حتمی شکل دے رہی ہے جہاں سیکورٹی کے فقید المثال بندو بست کیا جا رہا ہے وہیں یاتریوں کو دیگر سہولیات فراہم کرنے کے لئے بھی کوئی کشر باقی نہیں چھوٹی جا رہی ہے۔
شری امر ناتھ یاترا بورڈ کے مطابق یاتریوں کے لئے چاپر سروس کے لئے آن لان بکنگ شروع ہوگئی ہے۔
قابل ذکر ہے کہ سالانہ امر ناتھ یاترا کو خوش اسلوبی کے ساتھ پایہ تکمیل تک پہنچانے کی خاطر لکھن پور سے پوترا گھپا تک 60 ہزار سیکورٹی فورسز کو تعینات کرنے کا فیصلہ لیا گیا ہے۔
یاترا کے پیش نظر سی آر پی ایف نے ضلع اودھم پور میں کئی مقامات پر سپیشل ڈاگ اسکواڈ تعینات کئے ہیں۔
بی آر او حکام کا کہنا ہے کہ پہلگام کی طرف یاترا راستوں کو 15 جون سے قبل ہی مکمل طور پر بحال کیا جائے گا۔