ٹوکیو، 24 مئی: امریکہ، آسٹریلیا، ہندوستان اور جاپان کے چار فریقی اتحاد کواڈ کی تیسری چوٹی میٹنگ میں، ان ممالک کے سرکردہ رہنماؤں نے ایک آزاد اور کھلے ہند-بحرالکاہل خطہ اور امن کو یقینی بنانے کے لیے اپنے عزم کا اعادہ کیا۔ خطے میں استحکام، سلامتی اور خوشحالی کے لیے تعمیری ایجنڈے پر عمل کرنے کے عزم کا اظہار کیا۔
وزیر اعظم نریندر مودی، امریکی صدر جوزف آر بائیڈن، آسٹریلیا کے نو منتخب وزیر اعظم انتھونی البانیز اور جاپان کے وزیر اعظم فومیو کشیدا نے ہندوستانی بحرالکاہل کے علاقے میں ہونے والی پیش رفت اور عصری عالمی مسائل پر تبادلہ خیال کیا۔
اپنے ابتدائی کلمات میں مسٹرمودی نے اس بات پر خوشی کا اظہار کیا کہ بہت کم وقت میں کواڈ گروپ نے عالمی میدان میں ایک اہم مقام بنایا ہے۔ انہوں نے کہا کہ آج کواڈ کا دائرہ وسیع ہو گیا ہے ۔ ہمارا باہمی اعتماد، ہمارا عزم جمہوری قوتوں کو نئی توانائی اور ولولہ دے رہا ہے۔ کواڈ سطح پر ہمارا باہمی تعاون ایک آزاد، کھلے اور جامع ہند-بحرالکاہل خطے کو فروغ دے رہا ہے، جو ہم سب کا مشترکہ مقصد ہے۔
انہوں نے کہا کہ کووڈ-19 کی وبا کے منفی حالات کے باوجود، ہم نے کئی شعبوں میں باہمی ہم آہنگی کو بڑھایا ہے جیسے کہ ویکسین کی فراہمی، موسمیاتی کارروائی، پائیدار اور محفوظ سپلائی چین، ڈیزاسٹر مینجمنٹ اور اقتصادی تعاون۔ یہ ہندوستانی بحرالکاہل میں امن، خوشحالی اور استحکام کو یقینی بنا رہا ہے۔ انہوں نے کہا کہ کواڈ ہند بحرالکاہل خطے کے لیے تعمیری ایجنڈے کو آگے بڑھا رہا ہے۔ یہ کواڈ کی شبیہ کو ‘اچھائی کی طاقت ‘ کے طور پر مزید مستحکم کرے گا۔
یواین آئی
