دہشت گردی امن اور خوشحالی کیلئے سب سے بڑا خطرہ ہے ۔ لفٹینٹ گورنر
سرینگر:لفٹینٹ گورنر منوج سنہا نے آج یہاں راج بھون میں یومِ انسداد دہشت گردی کے موقع پر سینئر عہدیداروں ، ڈی سی اور ایس ایس پیز کو انسداد دہشت گردی کا عہد دلایا ۔
لفٹینٹ گورنر نے کہا ” دہشت گردی امن اور خوشحالی کیلئے سب سے بڑا خطرہ ہے ۔ آئیے دہشت گردی اور اس کے ماحولیاتی نظام کو ختم کرنے کا عزم کریں ۔ میں امن اور ہم آہنگی کو برقرار رکھنے اور انسانی جانوں کو خطرے میں ڈالنے والی قوتوں کو شکست دینے کے اپنے پختہ عزم کا اعادہ کرتا ہوں ۔ “
لفٹینٹ گورنر نے مزید کہا ” کسی کو بھی جموں کشمیر میں گڑ بڑ پیدا کرنے کی اجازت نہیں دی جائے گی ۔ ہمیں دہشت گردی کی سرگرمیوں اور سرحد پار سے کئے جانے والے پروپیگنڈے کو ختم کرنے کی اپنی کوششوں میں شامل ہونا چاہئیے ۔
معاشرے ، خاص طور پر نوجوانوں کو ان تنظیموں اور افراد کو تنہا کرنے کیلئے سرگرمی سے کام کرنا چاہئیے جو انسانیت کے دشمن کو پناہ اور مدد فراہم کرتے ہیں ۔ “
لفٹینٹ گورنر نے ملک کے اتحاد اور علاقائی سالمیت کو برقرار رکھنے کیلئے اپنی جانوں کا نذرانہ پیش کرنے والے بہادر فوجیوں کو بھی خراجِ عقیدت پیش کیا ۔
یہ دن ملک میں لوگوں کے تمام طبقوں میں دہشت گردی اور تشدد کے خطرے اور عوام ، معاشرے اور پورے ملک پر اس کے اثرات کے بارے میں بیداری پیدا کرنے کیلئے منایا جاتا ہے ۔
عہد کا متن حسب ذیل ہے ۔
ہم ہندوستان کے لوگ اپنے ملک کی عدم تشدد اور رواداری کی روائت پر پختہ یقین رکھتے ہوئے ، اپنی طاقت کے ساتھ ہر قسم کی دہشت گردی اور تشدد کا مقابلہ کرنے کا پختہ عزم کرتے ہیں ۔
ہم تمام ساتھی انسانوں کے درمیان امن ، سماجی ہم آہنگی اور افہام و تفہیم کو برقرار رکھنے اور فروغ دینے کا عہد کرتے ہیں اور انسانی جانوں اور اقدار کو خطرے میں ڈالنے والی خلل ڈالنے والی قوتوں سے لڑتے ہیں ۔