سری نگر، 28 فروری: سری نگر جموں شاہراہ پر سرمولی اُدھم پور کے نزدیک بھاری پسیاں گر آنے کے بعد شاہراہ پیرکے روز ٹریفک کی آمدورفت کے لئے بند رہی جس وجہ سے ادھم پور اور قاضی گنڈ میں سینکڑوں کی تعداد میں چھوٹی بڑی گاڑیاں درماندہ پڑی ہوئی ہے۔
ٹریفک حکام کے مطابق منگل کے روز بھی شاہراہ دو طرفہ ٹریفک کے لئے بند رہے گی۔
ٹریفک حکام نے بتایا کہ سرمولی اُدھم پور علاقے میں پیر کی صبح سے بھاری پسیاں گر آنے کا سلسلہ دن بھر جاری رہا جس وجہ سے شاہراہ پر پیر کے روز ٹریفک کی آمدورفت معطل ہو کررہ گئی۔
انہوں نے کہا کہ اگر چہ ٹریفک حکام نے شاہراہ کو قابل آمدورفت بنانے کی خاطر جی توڑ کوشش کی لیکن پہاڑی سے مسلسل پسیاں گر آنے کے سبب ٹریفک کو دن بھر کے لئے بند رکھا گیا۔
ان کے مطابق چونکہ سرمولی ادھم پور کے نزدیک بھاری پسیاں گر آئی ہیں جنہیں صاف کرنے میں کافی وقت لگے گا لہذا ٹریفک حکام نے فیصلہ کیا ہے کہ منگل(یکم مارچ) کے روز بھی شاہراہ پر ٹریفک کی آمدورفت معطل رہے گی۔
ٹریفک حکام نے بتایا کہ مسافروں کے جان ومال کو تحفظ فراہم کرنے کی خاطر ہی ٹریفک کی آمدورفت کو فی الحال بند رکھنے کے احکامات صادر کئے گئے ہیں۔
یو این آئی
