بڈگام کا فوجی جوان لیہہ میں فوت، اہلخانہ کی حکام سے ان کی میت ائیر لفٹ کرنے کی اپیل

سری نگر،25 فروری/  وسطی ضلع بڈگام کے وہاب پورہ علاقے سے تعلق رکھنے والے ایک فوجی جوان کی جمعے کی صبح لیہہ کے ایک ہسپتال میں دماغ کی نس پھٹ جانے سے موت واقع ہوئی ہے۔
دریں اثنا متوفی فوجی جوان کے اہلخانہ نے جموں وکشمیر کے لیفٹیننٹ گورنر منوج سنہا سے اپیل کی ہے کہ وہ ان کی میت کو ہوائی جہاز کے ذریعے سری نگر لانے کے لئے مداخلت کریں۔
خاندانی ذرائع نے یو این آئی کو بتایا کہ مذکورہ فوجی جوان کی چند روز قبل لیہہ میں دماغ کی نس پھٹ گئی تھی جس کے بعد ان کو ایک ہسپتال میں داخل کیا گیا تھا۔
انہوں نے کہا کہ ہسپتال میں چند روز تک موت و حیات کی کشمکش میں مبتلا رہنے کے بعد جمعے کی صبح وہ زندگی کی جنگ ہار گیا۔
متوفی فوجی جوان کی شناخت بشیر احمد گنائی ولد مرحوم غلام حسن گنائی ساکن وہاب پورہ بڈگام کے بطور ہوئی ہے۔
ان کے اہلخانہ نے حکومت بالخصوص جموں وکشمیر کے لیفٹیننٹ گورنر منوج سنہا سے اپیل کی ہے کہ وہ ان کی میت کو ہوائی جہاز کے ذریعے سری نگر لانے کے لئے اقدام کریں۔
متوفی کے پسماندگان میں اہلیہ کے علاوہ چار چھوٹی بیٹیاں شامل ہیں۔
جمعے کی صبح جب اس فوج جوان کے موت کی خبر ان کے آبائی گاؤں میں پھیل گئی تو وہاں ہر سو ماتم کا سماں بندھ گیا اور لوگوں کو زار و قطار روتے ہوئے دیکھا گیا۔
یو این آئی