سری نگر،16 فروری: اینٹی کرپشن بیورو (اے سی بی ) نے اننت ناگ میں خاتون سرپنچ کو رشوت لیتے ہوئے رنگے ہاتھوں دھر دبوچ کر سلاخوں کے پیچھے دھکیل دیا۔
اینٹی کرپشن بیورو کے ایک ترجمان نے بتایا کہ اے سی بی کو تحریری طورپر شکایت موصول ہوئی کہ ضلع اننت ناگ کے کھل ژوہر علاقے کی خاتون سرپنچ حفیظہ بیگم زوجہ غلام قادر کمار کام نپٹانے کے سلسلے میں سائل سے چھ ہزار پانچ سو روپیہ کی رشوت طلب کر رہی ہے۔
انہوں نے بتایا کہ شکایت موصول ہوتے ہی اے سی بی نے اس ضمن میں ایف آئی آر زیر نمبر 03/2022 کے تحت کیس درج کرکے تحقیقات شروع کی
اے سی بی کے مطابق سرپنچ کو پکڑنے کی خاطر اینٹی کرپشن بیورو نے ایک جال بچھایا جس دوران خاتون سرپنچ کو سائل سے چھ ہزار پانچ سو روپیہ کی رقم لیتے ہوئے رنگے ہاتھوں گرفتار کیا گیا ہے۔
انہوں نے مزید بتایا کہ آزاد گواہوں کی موجودگی میں خاتون سرپنچ کے قبضے سے رشوت کی رقم برآمد کی گئی ہے۔
یو این آئ
