سری نگر/ پولیس نے شمالی کشمیر کے قصبہ پٹن میں گذشتہ روز پیش آنے والے بینک ڈکیتی واقعے میں بینک محافظ سے چھینی گئی رائفل اور موقع سے فرار ہونے کے لئے استعمال کی جانی والی گاڑی کو جمعہ کی صبح برآمد کیا ہے۔
بتا دیں کہ پٹن کے شیر آباد کھور علاقے میں جمعرات کو پی پی ای کٹ پہنے تین اسلحہ براداروں نے جموں و کشمیر بینک کی ایک شاخ سے بندوق کی نوک پر 2 لاکھ 86 ہزار روپے لوٹ لئے۔
سرکاری ذرائع نے بتایا کہ پولیس نے جمعے کی صبح ضلع بارہمولہ کے کنزر علاقے کے ووسن گاؤں کے نزدیک پٹن میں جموں و کشمیر بینک کی ایک شاخ کے لٹیروں کی طرف سے فرار ہونے کے لئے استعمال کی جانے والی ماروتی گاڑی کو برآمد کیا۔
انہوں نے بتایا کہ جائے موقع کی تلاشی کے دوران بینک محافظ سے چھینی گئی12 بور رائفل کو بھی برآمد کیا گیا۔ان کا مزید کہنا تھا کہ لٹیروں کی تلاش کے لئے علاقے میں اور اس کے گرد و پیش تلاشی کارروائیاں تیز کر دی گئی ہیں۔
مقامی ذرائع نے بتایا کہ لٹیروں نے روپے اور رائفل لوٹ کر فرار ہونے کے لئے علی محمد ڈار ساکن کھور نامی ایک شہری کی گاڑی استعمال کی تھی۔
انہوں نے بتایا کہ علی محمد نے جائے واردات پر جمع ہجوم کو دیکھ کر گاڑی کھڑا کی تھی اور صورتحال کا جائزہ لینے کے لئے نیچے اترا تھا کہ لٹیروں نے اس کو پیٹ کر گاڑی چھین لی۔
ان کا کہنا تھا کہ گاڑی میں مذکورہ شہری کی والدہ اور ہمشیرہ بھی بیٹھی تھیں جنہیں نیچے اتارا گیا۔
یو این آئی
