ایشین میل نیوز ڈیسک
اننت ناگ،: جموں وکشمیر کے حساس ترین علاقہ جنوبی کشمیر کے چار اضلاع پر مشتمل اننت ناگ پارلیمانی نشست کے لئے تین مرحلوں میں ہونے والی پولنگ کے پہلے مرحلے کا منگل کی صبح سات بجے آغاز ہوگیا، جو ٹھیک چار بجے اپنے اختتام کو پہنچا۔
پولنگ عمل کے دوران ضلع اننت ناگ کے کئی مقامات پر پرتشدد احتجاجی مظاہرے بھی ہوئے ،جس دوران مظاہرین اور فورسز کے درمیان شدید جھڑپوں میں کئی افراد مضروب ہوئے ۔
فورسز نے مظاہرین کو تتر بتر کرنے کےلئے ٹیر گیس شلنگ کے ساتھ ساتھ پیلٹ بندوقوں کا بھی استعمال کیا ۔آخری اطلاعات ملنے تک کئی علاقوں میں کشیدگی صورتحال بنی ہوئی تھی ۔
اننت ناگ پارلیمانی حلقہ جو اننت ناگ، پلوامہ، کولگام اور شوپیاں اضلاع پر محیط ہے، کے ضلع اننت ناگ میں پولنگ کا آغاز ہوگیا ہے۔موصولہ اطلاعات کے مطابق اگرچہ ضلع اننت ناگ کے چھ اسمبلی حلقوں بشمول اننت ناگ، ڈورو، کوکر ناگ، شانگس، بجبہاڑہ اور پہلگام میں منگل کی صبح پولنگ کا باضابطہ آغاز ہوگیا تاہم صبح کے وقت کسی بھی پولنگ مرکز کے باہر رائے دہندگان کی قطاریں نظر نہیں آئیں۔ بعض پولنگ مراکز ایسے بھی ہیں جہاں یہ رپورٹ فائل کئے جانے تک کوئی ووٹ نہیں ڈالا گیا تھا۔
ضلع اننت ناگ کو پولنگ کے پیش نظر سیکورٹی فورسز کی بھاری تعداد میں تعیناتی سے فوجی چھاونی میں تبدیل کردیا گیا ہے۔
اننت ناگ رواں پارلیمانی انتخابات میں ملک کا واحد ایسا حلقہ ہے جس میں تین مرحلوں میں ووٹ ڈالے جانے ہیں۔ الیکشن کمیشن نے یہ فیصلہ جنوبی کشمیر کی حساسیت کو دیکھتے ہوئے لیا ہے۔
سرکاری ذرائع نے یو این آئی کو بتایا کہ ضلع اننت ناگ میں سیکورٹی کے غیرمعمولی انتظامات کئے گئے ہیں۔انہوں نے بتایا کہ ضلع میں پولنگ کے دوران تشدد کے خدشے کے پیش نظر سیکورٹی فورسز کی 170 کمپنیاں تعینات کی گئی ہیں۔
اننت ناگ پارلیمانی حلقہ جو اننت ناگ، پلوامہ، کولگام اور شوپیاں اضلاع پر محیط ہے،میں سہ پہر تین بجے تک مجموعی ووٹنگ شرح 11.22 فیصد درج کیا گئی۔اگرچہ سرکاری ذرائع نے چار بجے تک حتمی ووٹنگ شرح جاری نہیں کی تھی ،تاہم مجموعی طور پر ضلعے میں ووٹنگ کی شرح 12کے قریب درج کی گئی ۔
