سرینگر:پبلک سیفٹی ایکٹ (پی ایس اے) کے تحت تہاڑ جیل نئی دہلی میں مقید لبریشن فرنٹ چیئرمین محمد یاسین ملک کی بگڑتی صحت کی افواہ پھیلتے ہی مائسمہ میں ہڑتال کی گئی اور احتجاج بھی کیا گیا ۔
اطلاع کے مطابق لبریشن فرنٹ کے گڑھ سیول لائنز کے مائسمہ علاقہ میں سوموار کو مقامی مسجد سے اعلان کیا گیا جبکہ محبوس فرنٹ چیئرمین کی دوران حراست مسلسل صحت بگڑتی جارہی ہے ،جس پر دکانداروں سے دکانوں کے شٹر ڈائون کرنے کےلئے کہا گیا ۔
معلوم ہوا ہے کہ لائوڈ اسپیکر پر اعلان ہوتے ہی دکانداروں نے اپنی دکانوں کے شٹر نیچے کئے ،جس کے ساتھ ہی یہاں معمول کی کاروباری سرگرمیاں متاثر ہوئیں ۔
علاقے میں احتجاجی ریلی بھی نکالی جس میں محمد یاسین ملک کے افراد خانہ نے بھی شرکت کی ۔ واضح رہے پی ڈی پی صدر محبوبہ مفتی نے لبریشن فرنٹ کے چیئرمین محمد یاسین ملک کی تہاڑ جیل میں علالت پر اظہار افسوس کرتے ہوئے کہا ہے کہ حکومت ہند قیدیوں کی حالت زار کے تئیں غیر سنجیدہ ہے۔
چند روز قبل لبریشن فرنٹ کے چیئرمین محمد یاسین ملک کی ہمشیرہ نے سری نگر کے مائسمہ علاقے میں اپنی رہائش گاہ پر میڈیا کو بتایا ‘یاسین ملک جیل میں بہت علیل ہوگئے ہیں، انہیں ہسپتال منتقل کیا گیا ہے، وہ 16 اپریل سے بھوک ہڑتال پر ہیں وہ دوا بھی نہیں لے رہے ہیں اور آج یہ لوگ یہ بتانے پر مجبور ہوئے ہیں کہ وہ علیل ہیں جب کہ آج تک انہوں نے خاموشی اختیارکی’۔
محبوبہ مفتی نے یاسین ملک کی زیر حراست علالت پر اظہار تشویش کرتے ہوئے اپنے ایک ٹویٹ کہا ‘تہاڑ جیل میں یاسین ملک کی بگڑتی صحت کے بارے میں اُن کے اہل خانہ کے تحفظات حق بجانب ہیں، حکومت ہند قیدیوں کی حالت زار کے تئیں غیر سنجیدہ ہے، وہ اپنے سایسی مفادات کی تکمیل کے لئے پرگیہ سادھوی جیسے معتصب شخص کو ضمانت دے سکتے ہیں، جنتا پارٹی معتصب ہے’۔
قابل ذکر ہے کہ لبریشن فرنٹ کے چیئرمین یاسین ملک کو ریاستی پولیس نے ماہ فروری کی 22 تاریخ کو حراست میں لیکر پولیس تھانہ کوٹھی باغ میں مقید کردیا تھا۔
بعد ازاں 7 مارچ کو انہیں پی ایس اے کے تحت کوٹ بلوال جموں منتقل کیا گیا جہاں سے بعد ازاں انہیں 9 اپریل کو تہاڑ جیل دلی منتقل کیا گیا۔
بتادیں کہ مرکزی حکومت نے لبریشن فرنٹ پر حال ہی میں پابندی عائد کی۔
