سرینگر/قومی تحقیقاتی ایجنسی (این آئی اے) نے لبریشن فرنٹ چیئر مین محمد یاسین ملک کو فنڈنگ کیس میں گرفتار کرلیا ہے۔
محمد یاسین ملک ، جو کوٹ بلوال جیل جموں میں پبلک سیفٹی ایکٹ کے تحت ایام اسیری کاٹ رہے تھے، کو دلی کے تہار جیل منتقل کیا گیا ہے۔
حکام کے مطابق اس سے قبل این آئی اے نے جموں کی ایک عدالت سے ملک کی حراست کی اجازت حاصل کی تاکہ وہ اُس کی پوچھ تاچھ کرسکے۔
ملک کی تنظیم لبریشن فرنٹ کو گذشتہ مہینے مرکزی حکومت نے غیر قانونی قرار دیدیا۔
ملک کیخلاف سی بی آئی کے پاس بھی دو کیس درج ہیں۔ان کیسوں کا تعلق 1989میں سابق مرکزی وزیر داخلہ مفتی محمد سعید کی بیٹی ربیعہ سعید کی اغواکاری اور1990میں چار انڈین ایئر فورس اہلکاروں کی ہلاکت سے متعلق ہے۔
یاد رہے کہ این آئی اے نے گذشتہ تین روز کے دوران حریت (ع) کے چیئرمین میر واعظ عمر فاروق سے نئی دہلی میں اپنے ہیڈ کواٹر پر مبینہ فنڈنگ کیس کے سلسلے میں پوچھ تاچھ کی ۔میر واعظ کو گرفتار نہیں کیا گیا اور غالباً آج وہ واپس کشمیر لوٹ رہے ہیں ۔
