سرینگر: طویل عرصے سے جاری روایت سے ہٹ کر جموں و کشمیر قانون ساز اسمبلی نے پیر کے روز اسپیکر عبدالرحیم راتھر کی جانب سے تعزیتی حوالہ جات پیش کیے جانے کے فوراً بعد حکومتی امور کی کارروائی شروع کر دی۔
روایت کے برخلاف اسپیکر نے سابق اراکینِ اسمبلی شیخ مصطفیٰ کمال، دھرم پال اور غلام حسن کو خراجِ عقیدت پیش کرنے کے بعد قانون سازی سے متعلق کارروائی آگے بڑھائی۔
تعزیتی حوالہ جات کے دوران اسپیکر نے وفات پانے والے قانون سازوں کے نام پڑھ کر سنائے، تاہم کسی دوسرے رکن نے خراجِ عقیدت کی کارروائی میں شرکت نہیں کی۔ بعد ازاں ارکان نے مرحوم قانون سازوں کے احترام میں دو منٹ کی خاموشی اختیار کی۔ ماضی میں مختلف سیاسی جماعتوں سے تعلق رکھنے والے ارکان تعزیتی کارروائی میں حصہ لیتے تھے۔
روایتی طور پر تعزیتی حوالہ جات پیش کیے جانے کے بعد ایوان کی کارروائی پورے دن کے لیے ملتوی کر دی جاتی تھی اور کوئی سرکاری یا قانون سازی کا کام نہیں کیا جاتا تھا۔
گزشتہ خزاں کے اجلاس میں وزیرِ اعلیٰ عمر عبداللہ نے اسمبلی میں تعزیتی حوالہ جات پیش کرنے کے طریقۂ کار میں تبدیلی کی تجویز دی تھی۔ عمر عبداللہ نے کہا تھا:”جب میں پارلیمنٹ میں تھا تو اسپیکر کی جانب سے تعزیتی حوالہ جات پڑھنے کے بعد طویل تقاریر ہوتی تھیں، جس میں پورا دن گزر جاتا تھا۔بعد میں یہ فیصلہ کیا گیا کہ صرف اسپیکر تعزیتی حوالہ جات پڑھیں گے اور ارکان ایک منٹ کے لیے کھڑے ہو کر خاموشی اختیار کریں گے۔ میرے خیال میں ہمیں یہاں بھی اسی طریقۂ کار پر عمل کرنا چاہیے۔”
