جموں و کشمیر میں مسلسل امن اور ترقی کی اپیل؛ کشمیری پنڈت سالانہ یاترا میں شامل ہوئے
گاندربل، 18 ستمبر: لیفٹیننٹ گورنر منوج سنہا نے جمعہ کو کنگن کے ناراناگ سے سالانہ ہرمکھ-گنگبل یاترا کو ہری جھنڈی دکھا کر روانہ کیا، جس کے ساتھ ہی مقدس گنگبل جھیل کی یاترا کا آغاز ہو گیا۔
یاترا کو روانہ کرنے کے بعد نامہ نگاروں سے بات کرتے ہوئے منوج سنہا نے کہا کہ جموں و کشمیر اور ملک کے دیگر حصوں سے بڑی تعداد میں یاتری اس سالانہ یاترا کے لیے پہنچے ہیں۔
انہوں نے کہا، ”میں ان سب کے لیے نیک خواہشات کا اظہار کرتا ہوں اور مجھے امید ہے کہ اس مقدس یاترا کی برکتیں یہاں کے لوگوں پر ہمیشہ برقرار رہیں گی۔ جموں و کشمیر امن اور ترقی کی راہ پر مسلسل آگے بڑھتا رہے۔“
اس موقع پر ممبر پارلیمنٹ میاں الطاف احمد، کنگن کے ایم ایل اے میاں مہر علی اور سینئر سول و پولیس افسران موجود تھے۔ ہرمکھ گنگا گنگبل ٹرسٹ کے زیر اہتمام منعقدہ اس سالانہ یاترا میں شرکت کے لیے ملک کے مختلف حصوں سے بڑی تعداد میں کشمیری پنڈت بھی ناراناگ پہنچے۔
دریں اثنا، ضلع انتظامیہ اور متعلقہ محکموں نے یاترا کے راستے پر سیکیورٹی کے انتظامات اور دیگر سہولیات سمیت یاترا کے لیے تمام ضروری تیاریاں کی ہیں۔گاندربل ضلع کے بالائی علاقوں میں واقع گنگبل جھیل کی یہ سالانہ یاترا کشمیری پنڈتوں کے لیے ایک اہم مذہبی یاترا مانی جاتی ہے۔
