سری نگر:جموں و کشمیر حکومت نے اسمبلی میں کہا کہ پاکستان کے زیر قبضہ جموں و کشمیر (پی او جے کے) سے نقل مکانی کرنے والے افراد کو زمینوں اور گھروں پر مکمل قانونی مالکانہ حقوق دینے کے لیے متعدد ٹھوس اقدامات کیے گئے ہیں۔
ڈاکٹر نریندر سنگھ رینہ کے سوال کے جواب میں حکومت نے ایوان کو بتایا کہ 1947، 1965 اور 1971 کے متاثرہ مہاجرین جموں و کشمیر کے مختلف علاقوں میں بسائے گئے تھے اور انہیں بتدریج قانونی حقوق دینے کا عمل جاری ہے۔
جواب میں کہا گیا کہ کابینہ آرڈر نمبر 578 کے تحت 1947 کے مہاجرین کو ریاستی اور متروکہ زمینیں الاٹ کی گئیں جبکہ زمین کی کمی کے بدلے معاوضہ بھی دیا گیا۔ یہ معاوضہ ابتدا میں پانچ ہزار روپے فی کنال مقرر تھا، جسے 2008 میں بڑھا کر تیس ہزار روپے فی کنال کر دیا گیا۔
حکومت نے مزید بتایا کہ زرعی اصلاحات ایکٹ 1976 کی دفعہ 3A کے تحت مہاجرین کو متروکہ زمینوں پر قبضے کے حقوق دیے گئے جب کہ گورنمنٹ آرڈر نمبر 254 کے ذریعے ریاستی زمینوں پر بھی مالکانہ حقوق فراہم کیے گئے۔
اس کے علاوہ، حکومت نے 2024 میں تین اہم احکامات جاری کیے جن کے تحت 1947، 1965 اور 1971 کے مہاجرین کے ساتھ ساتھ مغربی پاکستان کے مہاجرین کو بھی ان زمینوں پر قانونی ملکیت دی گئی جن پر وہ دہائیوں سے قابض ہیں۔
بیان میں کہا گیا کہ تحصیلداروں کو ہدایت دی گئی ہے کہ وہ مستحق افراد کی فائلیں ترجیحی بنیادوں پر تیار کریں اور آگاہی کیمپوں کے ذریعے اس عمل کو تیز کیا جائے تاکہ کوئی بھی اہل شخص ان فوائد سے محروم نہ رہے۔
حکومت کے مطابق یہ اقدامات جموں و کشمیر میں دہائیوں سے مقیم مہاجرین کو انصاف دلانے اور انہیں ان کے حق ملکیت فراہم کرنے کی سمت ایک تاریخی پیش رفت ہے۔
