انبالہ: تینوں مسلح افواج کی سپریم کمانڈر صدر جمہوریہ ہند دروپدی مرمو نے بدھ کے روز یہاں انبالہ فضائی اڈے سے جدید ترین لڑاکا طیارے رافیل میں پرواز کی۔صدر مرمو اس سے قبل بھی سخوئی-30 لڑاکا طیارے میں پرواز کر چکی ہیں۔ انہوں نے 7 اپریل 2023 کو فضائیہ کے تیزپور اڈے سے سخوئی طیارے میں پرواز کی تھی۔ اس طرح وہ دو مختلف لڑاکا طیاروں میں پرواز کرنے والی ملک کی پہلی خاتون صدر بن گئی ہیں۔
رافیل میں پرواز کرنے والی صدر مرمو ہندوستان کی دوسری خاتون صدر ہیں جنہوں نے کسی جنگی طیارے میں پرواز کی ہے۔
اس سے پہلے سابق صدر پرتبھا پاٹل اور سابق صدر ڈاکٹر اے پی جے عبدالکلام بھی سخوئی لڑاکا طیارے میں پرواز کر چکے ہیں۔ اس واقعے کو خواتین کے بااختیار ہونے کی ایک بڑی علامت کے طور پر دیکھا جا رہا ہے۔ صدر مرمو نے پرواز سے قبل وہاں موجود لوگوں کا استقبال قبول کیا۔
اس موقع پر فضائیہ کے سربراہ، ایئر چیف مارشل اے پی سنگھ اور دیگر اعلیٰ فوجی افسران بھی موجود تھے۔ صدر نے فضائیہ کے پائلٹوں اور دیگر افسران سے بات چیت بھی کی۔
ہوائی اڈے پر پہنچنے پر فضائیہ کے سربراہ نے ان کا استقبال کیا۔ اس کے بعد صدر نے گارڈ آف آنر کا معائنہ کیا۔
پرواز سے پہلے صدر کو طیارے اور پرواز کے بارے میں تفصیلی بریفنگ دی گئی اور ان کا مکمل طبی معائنہ بھی کیا گیا۔
انبالہ فضائی اڈے سے صدر مرمو کی رافیل میں پرواز کرنے کی اہمیت یہ بھی ہے کہ فرانس سے خریدے گئے رافیل طیاروں کا پہلا اسکواڈرن اسی ہوائی اڈے پر ہندوستانی فضائیہ کے بیڑے میں شامل کیا گیا تھا۔
