سری نگر،: کرائم برانچ کشمیر کی اقتصادی جرائم ونگ نے اننت ناگ سنٹرل کوآپریٹو بینک لمیٹڈ کے جنرل منیجر کی شکایت جس میں ہتی گام ملٹی پرپز کوآپریٹو سوسائٹی (ایم پی سی ایس) میں بڑے پیمانے پر مالی فراڈ کا الزام لگایا گیا ہے، پر ایک مقدمہ درج کیا ہے۔
ونگ کے ایک ترجمان نے بتایا کہ شکایت کے مطابق سال 2014 میں ایم پی سی ایس ہتیگ ام اننت ناگ کے 127 اراکین کو 3.09 کروڑ روپے کے قرض فراہم کیے گئے تھے۔ جب کہ 2.50 کروڑ روپیے وصول کیے گئے، مذکورہ سوسائٹی کے 39 اراکین کے پاس 1.21 کروڑ روپیے باقی ہیں۔
انہوں نے کہا کہ تاہم مبینہ نادہندگان نے دعویٰ کیا کہ انہوں نے اپنے بقایاجات براہ راست سوسائٹی کے ساتھ ادا کیے ہیں اور ثبوت کے طور پر رسیدیں پیش کیں۔بیان میں کہا گیا کہ اس ضمن میں ابتدائی تحقیقات کا حکم دیا گیا اور انکشاف کیا گیا کہ بینک حکام نے ایم پی سی ایس ممبران کے ساتھ ملی بھگت سے غیر موجود افراد کے ناموں پر
فرضی قرض کے لئے کارروائی کی اور فنڈز ذاتی فائدے کے لیے ہڑپ کیے گئے۔انہوں نے کہا کہ اس ضمن میں ابتدائی طور پر جو افراد ملوث پائے گئے جن کی شناخت ریاض احمد بٹ ولد غلام قادر بٹ ساکن ہتی گام اننت ناگ ( اکائونٹنٹ)،محمد شفیع بٹ ولد غلام قادر بٹ ساکن ہتی گام اننت ناگ،غلام رسول بٹ ولد غلام قادر بٹ ساکن ہتی گام اننت ناگ ،غلام قادر بٹ ولد مختہ بٹ ساکن ہتی گام اننت ناگ، حسینہ بانو زوجہ محمد سفیع بٹ ساکن ہتی گام اننت ناگ اورمحمد یوسف بٹ ولد عبدالرزاق بٹ ساکن ہتی گام اننت ناگ کے طور پر ہوئی ہے۔
بیان میں کہا گیا کہ اس سلسلے میں پولیس اسٹیشن اقتصادی جرائم ونگ، (کرائم برانچ کشمیر) میں بدعنوانی کی روک تھام ایکٹ کی دفعہ 420، 468، 471، 120-B R/w سیکشن 5(2) کے تحت ایف آئی آر درج کی گئی ہے۔
انہوں نے کہا کہ اس سلسلے میں مزید تفتیش جاری ہے۔
