سری نگر: محکمہ موسمیات کی ایڈوائزری کے مطابق جموں وکشمیر میں 23 سے 26 اگست تک کچھ مقامات پر تیز اور زبردست بارش کا امکان ہے۔دریں اثنا کہیں کہیں بادل پھٹنے، سیلابی ریلے آنے، لینڈ سلائیڈنگ ہونے کے بھی خطرات ہیں۔
محکمے کے ایک ترجمان نے بتایا کہ جموں و کشمیر میں 22 اگست تک موسم گرم اور مرطوب رہنے کا امکان ہے تاہم اس دوران جموں صوبے کے جموں، ریاسی، اودھم پور، راجوری، کٹھوعہ اور سانبہ اضلاع میں کہیں کہیں 22 اگست کی شام کو بارش ہوسکتی ہے۔
انہوں نے کہا کہ 23 سے 26 اگست تک جموں وکشمیر کے کئی علاقوں میں ہلکی سے درمیانی درجے کی بارش کا امکان ہے تاہم اس دوران صوبہ جموں کے جموں، ریاسی، اودھم پور، راجوری، کٹھوعہ اور سانبہ اضلاع اور کشمیر کے اننت ناگ اور کولگام اضلاع میں کہیں کہیں بھاری بارش متوقع ہے۔
ان کا کہنا ہے کہ بعد میں 27 سے 30 اگست تک موسم ایک بار پھر گرم اور مرطوب رہنے کا امکان ہے تاہم اس دوران کہیں کہیں ہلکی بارش ہوسکتی ہے۔
محکمے نے اپنی ایڈوائزری میں کہا ہے کہ جموں و کشمیر میں 23 سے 26 اگست تک کچھ مقامات پر گرج چمک کے ساتھ تیز اور بھاری بارش کا امکان ہے اور اس دوران کہیں کہیں بادل پھٹنے، سیلابی ریلے آنے اور لینڈ سلائیڈنگ ہونے کے بھی خطرات ہیں۔
لوگوں سے کہا گیا ہے کہ وہ ندی نالوں، دریائوں اور کمزور تعمیراتی ڈھانچوں کے نزدیک جانے سے گریز کریں۔ایڈوائزری میں تمام متعلقہ محکموں اور عوام کو ہدایت دی گئی ہے کہ وہ ہدایات پر عمل کریں اور ضروری احتیاطی تدابیر اختیار کریں۔
