جموں: فوجی ذرائع کا کہنا ہے کہ پاکستانی فوج نے مسلسل چھٹی بار جنگ بندی معاہدے کی خلاف ورزی کرکے جموں و کشمیر کے نوشہرہ، سندربنی اور اکھنور سیکٹروں میں لائن آف کنٹرول (ایل او سی) پر بلا اشتعال چھوٹے ہتھیاروں سے فائرنگ کی جس کا موثر انداز میں جواب دیا گیا۔
ایک فوجی ترجمان نے بتایا’’29 اور 30 اپریل کی درمیانی شب پاکستانی فوج کی چوکیوں نے جموں و کشمیر کے نوشہرہ، سندربنی اور اکھنور سیکٹروں کے مقابل لائن آف کنٹرول کے پار بلا اشتعال چھوٹے ہتھیاروں سے گولہ باری شروع کی۔‘‘
انہوں نے کہا کہ وہاں تعینات فوجی جوانوں نے اس کا فوری اور موثر جواب دیا۔ تاہم کسی بھی جانب کسی جانی نقصان کی کوئی اطلاع نہیں ہے۔
واضح رہے کہ ایل او سی پر فائرنگ کا تبادلہ 22 اپریل کو پہلگام میں بہیمانہ دہشت گردانہ حملے کے بعد ہندوستان اور پاکستان کے درمیان بڑھتی ہوئی کشیدگی کے درمیان ہوا تھا جس میں 25 سیاحوں اور ایک مقامی باشندے کی موت ہوئی تھی۔
ہندوستان اور پاکستان کے درمیان بڑھتی ہوئی کشیدگی کے پیش نظر جموں خطے میں بین الاقوامی سرحد (آئی بی) اور لائن آف کنٹرول (ایل او سی) کے قریب واقع گاؤں میں رہنے والے لوگ زیر زمین بینکروں کی صفائی، کھیتوں کی فصلیں کاٹنے اور کسی بھی ممکنہ صورتِ حال کا سامنا کرنے کے لیے خود کو تیار کر رہے ہیں۔
مقامی لوگوں کا کہنا ہے کہ کسی کو معلوم نہیں کہ اگلا لمحہ کیا لائے گا، ہم نے فیصلہ کیا ہے کہ زیر زمین بینکروں کی صفائی کریں تاکہ گولہ باری یا فائرنگ کی صورت میں ہم اپنی جانیں بچا سکیں۔
واضح رہے کہ ہندوستان اور پاکستان کے درمیان مجموعی طور پر 3,323 کلومیٹر طویل سرحد قائم ہے، جس میں سے 221 کلومیٹر بین الاقوامی سرحد (آئی بی) اور 744 کلومیٹر لائن آف کنٹرول (ایل او سی) جموں و کشمیر میں واقع ہے۔
یو این آئی
