مارچ میں تجارتی برآمدات میں اضافہ، تجارتی خسارہ 21.54 بلین ڈالر رہا

نئی دہلی: جغرافیائی سیاسی غیر یقینی صورتحال اور عالمی تجارتی جنگ کے ماحول میں مارچ 2025 میں ہندوستان کی تجارتی سامان کی برآمدات 41.97 بلین ڈالر رہی، جو ایک سال پہلے کے اسی مہینے کے مقابلے میں 0.67 فیصد زیادہ ہے۔ تجارتی خسارہ (تجارتی برآمدات اور درآمدات کے درمیان فرق) ایک سال قبل 15.31 بلین ڈالر کے مقابلے میں 21.54 بلین ڈالر تک بڑھ گیا۔
پیر کو وزارت تجارت اور صنعت کی طرف سے جاری کردہ اعداد و شمار کے مطابق مارچ میں درآمدات 11 فیصد بڑھ کر 63.51 بلین ڈالر تک پہنچ گئیں۔
مالی سال 2024-25 کے دوران ہندوستان سے تجارتی سامان کی کل برآمدات اسی سطح پر رہیں جو ایک سال پہلے 437.42 بلین ڈالر تھیں۔ سال 2023-24 میں تجارتی سامان کی برآمدات 437.07 بلین ڈالر تھیں۔
ہندوستان کی بین الاقوامی تجارت کے تازہ ترین اعداد و شمار کے بارے میں اطلاع دیتے ہوئے کامرس سکریٹری سنیل بارتھوال نے صحافیوں کو بتایا کہ مالی سال 2024-25 عالمی تجارت کے لیے مشکل وقت تھا۔
انہوں نے مزید کہا کہ اس عرصے کے دوران کئی ممالک میں جغرافیائی سیاسی کشیدگی، سمندری تجارتی راستوں میں رکاوٹیں اور کساد بازاری کے اثرات دیکھے گئے۔ اس کے باوجود ہندوستان نے برآمدی شعبے میں دیگر ممالک کے مقابلے بہتر کارکردگی کا مظاہرہ کیا ہے۔‘‘