100 اور 200 روپے کے نئے نوٹ جلد جاری ہوں گے: آر بی آئی

ممبئی:ریزرو بینک آف انڈیا (آر بی آئی) جلد ہی مہاتما گاندھی (نئی) سیریز میں 100 اور 200 روپے کے نئے بینک نوٹ جاری کرے گا۔
آر بی آئی کے چیف جنرل منیجر پونیت پنچولی نے منگل کو کہا کہ ان نئے نوٹوں پر ریزرو بینک کے گورنر سنجے ملہوترا کے دستخط ہوں گے۔ ان نئے نوٹوں کا ڈیزائن موجودہ مہاتما گاندھی (نئی) سیریز کے 100 اور 200 روپے کے نوٹوں جیسا ہوگا۔ یعنی، ان کے رنگ، پیٹرن، اور حفاظتی خصوصیات موجودہ نوٹوں کے مطابق رہیں گی۔
آر بی آئی نے واضح کیا ہے کہ پہلے جاری کیے گئے تمام پرانے 100 اور 200 روپے کے نوٹ بھی گردش میں رہیں گے اور انہیں قانونی ٹینڈر سمجھا جائے گا۔
قابل ذکر ہے کہ یہ قدم نقدی کی فراہمی کو برقرار رکھنے اور بینکاری نظام میں استحکام کو یقینی بنانے کے مقصد سے اٹھایا گیا ہے۔ اس کے علاوہ، نئے گورنر کے دستخط والے نوٹ جاری کرنا ایک معمول کا عمل ہے جو ہر نئے گورنر کے چارج سنبھالنے کے بعد کیا جاتا ہے۔