نئی دہلی: جنوبی افریقہ کے دورے پر جمعہ سے شروع ہونے والی چار میچوں کی ٹی 20 سیریز کے پہلے میچ میں سوریہ کمار یادو کی قیادت والی ہندوستانی ٹیم جیت کے مقصد کے ساتھ 17 سال بعد ڈربن کے کنگس میڈ میدان میں اترے گی۔
ہندوستان نے سال 2007 میں کنگس میڈ گراؤنڈ میں واحد ٹی20 میچ کھیلا ہے۔ 17 سال پہلے کھیلے گئے اس میچ میں ہندوستانی ٹیم نے جنوبی افریقہ کو 37 رنوں سے شکست دی تھی۔ اس میچ میں روہت شرما نے نصف سنچری بنائی تھی اور آر پی سنگھ نے خطرناک گیندبازی کرتے ہوئے چار اوورز میں صرف 13 رنز دے کر چار وکٹیں حاصل کیں۔
سیریز کا پہلا میچ ڈربن کے کنگس میڈ گراؤنڈ میں کھیلا جائے گا۔ اس گراؤنڈ کی پچ کا مزاج سمجھنا بڑا ہی مشکل رہا ہے۔ اس گراؤنڈ پر 18 ٹی-20 انٹرنیشنل میچ کھیلے جا چکے ہیں۔ دیکھا گیا ہے کہ یہ ایک ہائی اسکورنگ گراؤنڈ رہا ہے، اس گراؤنڈ میں پہلی اننگ میں اوسط اسکور 153 رنز اور دوسری اننگ میں اوسط اسکور 135 رنز پر آتا ہے۔ اس گراؤنڈ پر پہلے بیٹنگ کرنے والی ٹیم نو بار اور دوسری اننگ میں بیٹنگ کرنے والی ٹیم آٹھ بار جیت چکی ہے۔ ایک میچ کا کوئی نتیجہ نہ نکل سکا۔ گزشتہ سال اسی گراؤنڈ پر آسٹریلیا نے 191 رنز کا ہدف کامیابی سے حاصل کر کے جنوبی افریقہ کو شکست دی تھی۔ اگر ہم ریکارڈ پر نظر ڈالیں تو ہندوستانی ٹیم یہاں پچھلی پانچ ٹی-20 سیریز میں ایک بار بھی نہیں ہاری ہے۔ اس دوران تین سیریز ڈرا ہو چکی ہیں۔ دونوں ممالک کے درمیان اب تک نو دو طرفہ ٹی-20 سیریز کھیلی جا چکی ہیں۔ ان میں سے ہندوستان نے چار اور افریقہ نے دو جیتے ہیں۔ ہندوستان کو آخری بار نو سال قبل اکتوبر 2015 میں جنوبی افریقہ سے ٹی 20 سیریز میں شکست ہوئی تھی۔
ٹی ٹوئنٹی ورلڈ کپ کے سیمی فائنل کے بعد یہ پہلا موقع ہوگا جب ہندوستان اور جنوبی افریقہ کی ٹیمیں آمنے سامنے ہوں گی۔
جنوبی افریقہ اور ہندوستان کے درمیان پہلا ٹی-20 انٹرنیشنل میچ سال 2006 میں کھیلا گیا تھا۔ دونوں ٹیموں کے درمیان اب تک 27 میچز کھیلے جا چکے ہیں جن میں سے جنوبی افریقہ نے 11 اور ہندوستانی ٹیم نے 15 میچ جیتے ہیں۔ ایک میچ بے نتیجہ بھی رہا ہے۔ ان میں سے جنوبی افریقہ کی سرزمین پر کھیلے گئے نو میچوں میں سے ہندوستانی ٹیم نے چھ جیتے اور تین میں شکست کھائی۔ ہندوستانی تیز گیند بازی کی ذمہ داری ارشدیپ سنگھ کی قیادت میں اویش خان، وجے کمار ویشاکھ اور یش دیال جیسے کھلاڑیوں پر ہوگی۔
جنوبی افریقہ کے خلاف اس سیریز میں کھیلنے والے کئی کھلاڑیوں کی نظریں آئی پی ایل کی بڑی نیلامی پر ہوں گی۔ اس ٹیم کے 15 میں سے 11 کھلاڑیوں کو آئی پی ایل کی مختلف فرنچائزز نے برقرار رکھا ہے، لیکن چار کھلاڑی ایسے ہیں جنہیں برقرار نہیں رکھا گیا ہے اور آئندہ نیلامی میں ٹیمیں ان میں دلچسپی لے سکتی ہیں۔
جنوبی افریقہ کے دورے پر گئی ہندوستانی ٹی20 ٹیم اس طرح ہے: سوریہ کمار یادو (کپتان)، ابھیشیک شرما، سنجو سیمسن (وکٹ کیپر)، رنکو سنگھ، تلک ورما، جیتیش شرما (وکٹ کیپر)، ہاردک پانڈیا، اکشر پٹیل، رمندیپ سنگھ، ورون چکرورتی، روی بشنوئی، ارشدیپ سنگھ، وجے کمار ویشاکھ، اویش خان اور یش دیال۔
